ЕО елдері Венгрияның құпия келіссөздерге қолжетімділігін шектеді

Еуропалық көшбасшылар маңызды мәселелерді Венгриясыз талқылауды жиілетті, өйткені ЕО мәліметтердің Ресейге кетуінен қауіптенеді, деп хабарлайды Arasha.kz.

Брюссельде кездесулердің тар форматына көшу және сыртқы саясат пен қауіпсіздікке қатысты маңызды материалдар алдын ала жіберілетін елдер шеңберін шектеу жиілеп кетті. Politico басылымының мәліметінше, мұндай шаралар жабық талқылаулардағы ақпарат ЕО-дан тыс жерлерге кетіп қалуы мүмкін деген күдікпен байланысты.

Басылымның дереккөздері серіктестер арасында Венгрия премьер-министрі Виктор Орбанның айналасына қатысты күмән туындағанын алға тартады: ЕО-да ішкі келіссөздердің егжей-тегжейлері Мәскеуге берілуі мүмкін деп есептелгелі қашан. Польша премьер-министрі Дональд Туск мұндай қауіптің бірнеше жылдан бері бар екенін, сондықтан ол отырыстарда тек қажет болған жағдайда ғана және барынша қысқа сөйлеуге тырысатынын айтты.

Washington Post бұған дейін Венгрия билігі Украинадағы соғыс кезінде Ресеймен тығыз байланыста болғанын жазған еді. Басылымның мәліметінше, Венгрия СІМ басшысы Петер Сийярто ЕО елдерінің өкілдерімен кездесулер арасындағы үзілістерде Ресей министрі Сергей Лавровқа мәліметтер беріп отырған.

Нәтижесінде, Politico дереккөздері атап өткендей, түйткілді тақырыптар көбіне шағын топтарда талқылана бастады. Мысалы, «Веймар үштігі» (Франция, Германия, Польша) форматында немесе Солтүстік Еуропа және Балтық жағалауы елдерінің бірлестіктерінде. Мұндай кездесулердің мақсаты  ақпараттың жария болу қаупін азайту және шешімдерді қабылдауды жеделдету.

Будапешт бұл жарияланымдарды Венгрияда 12 сәуірге жоспарланған парламенттік сайлау қарсаңындағы «фейктер» мен «қастандық теориялары» деп атады. Сонымен қатар, дереккөздердің айтуынша, ЕО дауыс беру барысына әсер етуді көздеп отырған жоқ, бірақ ақпараттың жылыстау ықтималдығын азайту үшін құпия құжаттармен жұмыс істеу ережелерін қатаңдатуды талқылауда.

Дипломаттар бұл жағдай одақ ішіндегі сенімге нұқсан келтіретінін және егер Орбанның партиясы билікті сақтап қалса, бұдан да қатаң қадамдар қажет болуы мүмкін екенін ескертеді. Бұған дейін Венгрия Киевке берілетін 90 миллиард еуро көлеміндегі көмек пакетін бұғаттап, ЕО бойынша серіктестерінің қатаң реакциясын тудырған болатын.