Ертістің арнасы тереңдетіледі

Ертіс өзені тереңдетіліп, жағалауы бекітіледі. Глубокое ауданындағы жағажайға ертіс арнайы техника жеткізілді. 

Елді мекендерге қауіп төндірмес үшін, су арнасын бұру жұмыстары жүргізіледі. Әйтпесе соңғы жылдары Ертіс арнасы кеңейіп, ауылдарға жақындап қалды. Ауқымды жобаны қазақстандық инженерлер қытайлық мамандармен бірлесе жүзеге асырады. 

Соңғы уақытта Ертістің бағыты Прапорщиково ауылы маңында күрт өзгерді. Күшті ағыс жағалаудан асып, тұрғын үйлер мен инфрақұрылымдық нысандарға қауіп төнді. Ал су шайған жерлерде электр желілері тығыз шоғырланған.

Константин Боровиков, Глубокое ауданы ТЖБ бастығының міндетін атқарушы:

- Өзен суы арнасынан асып, тұрғын үйлерге дейін жетті. Төтенше жағдайдың алдын алу мақсатында жоспар жасақталды. Жағалаудың беріктігін арттыруға басымдық беріледі.

Төтенше жағдай қызметкерлері суды бөгеу жұмыстарын тәулік бойы атқарып жатыр. Ертіс өзеніне топырақ алатын қондырғысы бар екі су көлігі жеткізілді. Мамандар арна түбі 9 метрге тереңдетілген соң судың деңгейі түседі, дейді. Таяуда жер қазатын тағы екі кеме келуі тиіс. Табиғи апаттың алдын алуға қазақстандық және қытай инженерлері бірлесе әрекет етуде.

Қайрат Жүсіпов, Құрылыс компаниясының басшысы:

- Гравиймен былтырдан бастап суды бөгегенбіз. Гравиймен көтеріп, елдердің бау-бақшасын су шайып кетпесін деп өткізгенбіз. Қазіргі уақытта тағы да көтеріп жатырмыз. Содан кейін бетондап, су бөгеу керекпіз.

Өзен түбін тереңдететін жер снарядтары тұрақты техникалық күтімді қажет етеді. Осы мақсатта Ертіс жағасынан кеме жөндейтін шағын кәсіпорын салынады. Жергілік әкімдік қолға алған жоба құрылысына мемлекет қаражаты мен аспан асты елінен келетін инвестиция жұмсалады.

Авторлары:Талғат Исламұлы, Вячеслав Ветлугин, Дмитрий Пыхтин