Есіктегі белгілер : Атырау полициясы түсініктеме берді

Әлеуметтік желілерде Атырау қаласындағы «Береке» ықшамауданында белгісіз ер адамның көпқабатты үйдің пәтер есіктеріне «белгі» қалдырып жүргені туралы видео тарады. Бұл жағдай тұрғындар арасында алаңдаушылық туғызып, полицияға көптеген өтініштер түсті.

Атырау облыстық полиция департаментінің мәліметінше, 2025 жылғы 1 қарашада Криминалдық полиция басқармасының қызметкерлері аталған факті бойынша тексеру жүргізген.

Тексеру нәтижесінде видеода бейнеленген адамның — 1969 жылы туған, сол ықшамауданның тұрғыны екені анықталды. Онымен және туыстарымен профилактикалық әңгіме жүргізілді.

Олардың айтуынша, ер адам 2022 жылы микроинсульт алған, қазіргі уақытта сөйлеу қабілеті мен бағдарлауында қиындықтар бар. Кейде серуен кезінде кіреберістер мен қабаттарды шатастырып алады — видео түсірілген күні де осындай жағдай орын алған.

Тексеру барысында ешқандай заңсыз әрекет немесе «белгі қалдыру» фактілері анықталмаған.

Полиция тұрғындарды сабыр сақтауға және расталмаған ақпаратты таратпауға шақырды.

«Күмәнді немесе күдікті жағдайлар туындаған кезде азаматтар “102” нөміріне немесе жақын маңдағы полиция бөлімшесіне дереу хабарласуы қажет», — деп атап өтті Атырау облыстық полиция департаменті.

Бүгін, 14:49