Еурокубок, Сәтпаев жарақаты, жаңа ойыншылар: Қайрат өкілдері жаңа маусым мақсаттарын атады

Inform.KZ парақшасынан алынған ақпаратқа сүйене отырып, Qazaq24.com хабарлама жасады..

Клуб базасында өткен жиында 2026 жылғы маусымға арналған дәстүрлі сары-қара жейде мен сыртқы ойындарға арналған ақ форма, сондай-ақ қақпашылардың киімі көрсетілді. Одан кейін негізгі ерлер құрамасы, әйелдер және зағип футболшылар командалары таныстырылды. Ерлер құрамасында клубқа жақында қосылған қорғаушы Лукас Африко, жартылай қорғаушылар Себастьян Себальос, Яакко Оксанен және Ойва Юккола болды.

Жаңа маусымдағы мақсат

Ресми бөлімнен кейін ұйымдастырылған баспасөз-конференциясында «Қайрат» ФК бақылаушылар кеңесінің төрағасы Қайрат Боранбаев жаңа маусымда команда алдында қойылған міндет пен мақсаттарға тоқталды.

— Біздің мақсатымыз өзгерген жоқ. Ең биік жетістіктерге ұмтыламыз. Егер қаржылай мәселе не футболшылар шақыру бойынша қиындықтар болса, түсінуге болады. Бірақ қазір клубта бәрі бар. Тағы (ред. — еурокубокта) шулатуға тырысамыз. Әрине, басқа клубтардың жекеменшікке өткені жақсы, бәсекелестік пайда болады. Бірақ біз үшін мақсат өзгермейді. Мысалы, бапкерге қазір 2-орын деп айтсам, ол келіспейді, — деді Қайрат Боранбаев.

Фото: Александр Павский/Kazinform

Жаңа ойыншылар

Ал негізгі команданың бас бапкері Рафаэль Уразбахтин жаңа келген ойыншыларға көңілі толатынын атап өтті.

— Жаңа ойыншылар клубтан кеткен ойыншыларымыздан әлдеқайда мықты. Әрине, олардың физикалық дайындығы әртүрлі. Мәселен, Финляндиядан келген жігіттер физикалық тұрғыдан дайын деуге болады. Өйткені оларда да чемпионат жақында ғана аяқталып, бізде секілді көктемде басталады. Яғни, олар өз командаларында оқу-жаттығу жиындарынан өтіп келді. Қалған ойыншылар жұмысты жалғастырыа жатыр. Олар тезірек командаға бейімделіп, өздерін жақсы жағынан көрсетеді деп үміттенеміз, — деді Рафаэль Уразбахтин.

Қайрат Боранбаевтың айтуынша, шетелдік жас ойыншылардың Қазақстанға келуі — ел чемпионатының бәсекеге қабілетті әрі тартысты бола бастағанының белгісі.

— Біз жаңа футболшыларды Чемпиондар лигасында жинаған тәжірибемізді ескере отырып шақырдық. Барлық командаларда жастарға көп сенім артылатынын көрдік. Сондай-ақ «Челсиге» барған сапарымызда олардың стратегиясының түбегейлі өзгергенін байқадық. Олар қазір жастарға сенім артады, команда өте жас ойыншылар жиналған. Сәйкесінше, біз де өз тарапымыздан жеңіске деген құштарлығы жоғары, жас ойыншыларды тартуға тырыстық, — деп түсіндірді ол.

Фото: Александр Павский/Kazinform

Сәтпаев командаға оралады

Рафаэль Уразбахтин бірнеше ай бойы жарақатынан емделген 17 жастағы алматылық футболшы Дастан Сәтпаев 24 ақпаннан бастап командамен бірге жаттығуға кірісетінін айтты.

Ал Қайрат Боранбаев болашақ «Челси» ойыншысына байланысты ағылшын командасының мамандарымен әрдайым байланыста екенін айтты.

— «Челси» футбол клубымен келісімшарты күшіне енгендіктен, қазір барлық қажетті оңалту шараларын солардың өздері жүргізіп жатыр. Ол екі ай бойы Катарда болды. Осыдан бір апта бұрын ғана Қазақстанға оралды. Катарда онымен бір топ жаттықтырушылар айналысса, Алматыға басқа жаттықтырушылар штабы келді. Олар Дастан дайындығымен жұмыс істеді. Қазір біз «Челси» клубының Дастанға қатысты барлық қажетті нұсқаулықтарды алдық. Сондықтан ол сақадай сай болады деп үміттенеміз, — деді Қайрат Боранбаев.