Еуропада лудоманияның алдын алудың өз әдісі бар. LIVE

Жергілікті халық бәс тігуге  өздігінен онлайн шектеу қоя алады, жарнама мен бонустар қатаң реттеледі, ойыншы да өте жас болмауы керек. Кәрі құрлықта бәсқұмарлықтан құтқаратын тағы қандай талаптар бар?

Ғалымжан Қараманұлы, тілші:

- Швецияда лицензияланған құмар ойындардың барлығы қатаң қадағаланады. Олар өзін-өзі шектеудің мемлекеттік онлайн қызметіне бағынышты. Мәселен, ойыншы арнайы сайтқа кіріп, «уақытша үзіліс» мерзімін таңдай алады: 1, 3 немесе 6 ай. Содан кейін операторлар оған онлайн да, офлайн да бәс тігуге жол бермейді. Ұлыбританияда да осыған ұқсас жүйе қолданылады.

Ал Бельгия ойыншының ең төменгі жасын 21-ге дейін көтеріп, жарнамаға қатысты талаптарды қатаңдатып тастады. Еуропалық реттеушілер, осылайша, бәсқұмарларға өзін-өзі тоқтатуға мүмкіндік беріп отыр. Құжат жинап, мекеме жағаламайды: доғарамын деген шешімі болса жетіп жатыр. Осылайша, мәселе ашық әрі түсінікті қорғаныс механизміне айналған. Банк картасын бұғаттау сияқты оп-оңай.

Магали Клавье, Бельгия құмар ойындары бойынша комиссия:

-  Лицензиясы жоқ операторлар трансұлттық деңгейде әрекет етеді. Ал дәстүрлі жазалау әдістері оларға тосқауыл емес. Сондықтан заңсыз құмар ойындарымен елдер бірлесіп күресуі керек. Бізге неғұрлым үйлестірілген еуропалық ұстаным қажет: ортақ іс-қимыл, деректермен алмасу және заңсыз контентті бұғаттаудың жедел шаралары.

Жүйенің екінші тежегіш күші – қыз-қыз қайнаған ойын нарығын «салқындату»: жарнама азайтылған, бонустар қысқарған, арандататын ұсыныстарға тосқауыл қойылған. Еуропалықтар маркетинг қаншалықты агрессивті болса, оның құрбанына айналу қаупі де жоғары екенін жақсы түсінеді.

Хизер Уордл, әлеуметтанушы:

- Адам ерте жастан қандай контент көрсе, ол оның әлеуметтік дағдысына

терең орнығуы мүмкін. Тәуекел тобына жататын жас буынның жағдайы одан әрі қиындай түседі деген нақты қауіп бар. Жарнама, стримдер мен ойын қосымшалары баланы бәс тігуге жаман үйретеді. 

Ғалымжан Қараманұлы, тілші:

- Түйін бір: бәрін бірден тыйып тастау мақсат емес, мақсат – лудоманияға апаратын қауіптің алдын алып, қолжетімсіз ету, агрессивті жарнама мен бақылаусыз онлайн ставкалардан құтқару. 

Авторы: Ғалымжан Қараманұлы