ФБР Аргентина футбол қауымдастығына қатысты тергеуді қайта бастады

Басылымның мәліметінше, 2026 жылғы футболдан әлем чемпионаты өтіп жатқан кезде ФБР агенттері АҚШ аумағында Аргентина футбол қауымдастығының қаржылық операциялары бойынша куәгерлерден жауап ала бастаған.

Журналистердің жазуынша, AFA қаржы жүйесі арқылы жүздеген миллион доллар өткізген. Тергеушілердің болжамынша, бұл қаражаттың бір бөлігі агенттіктің құзыретіне кіретін ықтимал қылмыстық әрекеттермен байланысты болуы мүмкін.

Материалда TourProdEnter LLC компаниясы AFA-дан кемінде 260 млн АҚШ доллары көлемінде табыс алғаны айтылады. Алайда La Nacion зерттеген банк құжаттарына сәйкес, бұл қаржының тек бір бөлігін ғана ұйымның нақты операциялық шығындарымен байланыстыруға болады.

Басылымның мәліметінше, тергеу алғаш рет 2024 жылы басталған. Сол кезде ФБР компания басшылығы мен Аргентина футбол қауымдастығы жетекшілері арасындағы байланыстар қылмыстық іс қозғауға жеткілікті негіз емес деген қорытындыға келген.

Алайда кейін журналистер Флорида штатында қаржылық, банктік және корпоративтік операциялардың тұтас желісін анықтаған. Осыған байланысты тергеу қайта жанданған.

Сонымен бірге басылым ФБР-дің бұл тергеуі 2026 жылғы әлем чемпионатындағы ойындармен немесе Аргентина құрамасының ширек финалға шығуымен байланысты емес екенін атап өтеді. Тергеудің қайта жандануы тек уақыт жағынан сәйкес келген.

Еске салайық, Аргентина 1/8 финалда Египетті 3:2 есебімен жеңіп, ширек финалға жолдама алған болатын. Матчтан кейін Египет құрамасының бас бапкері кездесудің нәтижесі «алдын ала ұйымдастырылған» деген пікір білдірді.

ӘЧ-2026: FIFA алғаш рет қызыл қағаз алған футболшыны жазадан босатты

Кейін Египет футбол қауымдастығы төрешілердің әрекетіне байланысты ФИФА-ға шағым түсірді. Олар даулы голдың есепке алынбауы, пенальти белгіленбеуі және бірқатар төрелік шешімдер әділ болмағанын мәлімдеді.