Франция алтын қорын елге қайтарды: Париж 13 млрд еуро табыс тапты

Франция АҚШ-та сақталған алтын резервтерін толықтай елге көшіру процесін аяқтады. Бұл туралы Reuters агенттігі хабарлады.

Әңгіме жалпы көлемі 129 тонна алтын туралы болып отыр. Бұл Францияның жалпы алтын қорының шамамен 5%-ын құрайды. Бұған дейін аталған активтер Нью-Йорк қаласында сақталған.

Франция Орталық банкі 2025 жылдың шілдесінен 2026 жылдың қаңтарына дейін ескі үлгідегі алтынды сатып, оның орнына халықаралық стандарттарға сай жаңа құймалар алған. Нәтижесінде бұл алтын Парижге жеткізіліп, ел ішінде сақтауға орналастырылды.

Реттеуші орган бұл қадамды активтерді жаңарту қажеттілігімен түсіндірді. Ішкі аудит 2024 жылы-ақ АҚШ-та сақталған алтынды жаңарту туралы ұсыныс жасаған болатын.

Банк басшысы Франсуа Виллеруа де Гало жаңа стандарттағы алтынды Парижде сақтау шешімі оның Еуропа нарығында еркін айналымда болуымен байланысты екенін атап өтті. Оның айтуынша, бұл қадамның саяси астары жоқ.

Жалпы, Францияның алтын қоры өзгеріссіз қалды және шамамен 2 437 тоннаны құрайды. Алайда операция нәтижесінде ел қомақты табысқа қол жеткізді: 2025 жылы 11 млрд еуро, ал 2026 жылы қосымша 1,8 млрд еуро пайда түскен.

Сонымен қатар, реттеуші орган 2028 жылға дейін қалған 134 тонна алтынды, оның ішінде ескі құймалар мен монеталарды толық жаңартуды жоспарлап отыр.