Футбол матчы кезінде трансляцияның үзілуі оқиғасы қайталанбайды министрлік

Бүгін Үкімет отырысынан кейінгі баспасөз мәслихатында тілшілер «Қайрат» — «Реал Мадрид» матчы кезінде неліктен трансляция үзіле бергенін сұрады.

— Әрине, бұл кездесу баршамыз үшін елеулі оқиға болды. Реал — ол әлемге әйгілі команда. Біздің білуімізше, кейде оның ойынын тамашалайтын адамдардың саны 1 млрд-қа дейін жетеді. Матч кезінде Qazaqstan телеарнасының интернет порталында сондай оқиға болды (трансляцияның үзілуі). Бірақ эфирді кабелдік телеарна, спутниктік телеарна көрсетіп тұрды. Атап айтқанда, нарық өзгеріп жатыр, халық негізінен телеарнаны емес, интернетті көбірек қарай бастады, — деді Досжан Мұсалиев.

Оның айтуынша, «Қайрат» — «Реал Мадрид» матчы барысында көрермендер саны миллиондап артқан.

— Мұндай жағдай бізде болмаған еді. Дегенмен, осы оқиғадан кейін сабақ алып, Qazaqstan телеарнасы «Қазақтелеком» компаниясымен бірлесе тиісті шараларды қабылдады. Өздерінің серверлік қуатын көтерді. Сондықтан болашақта мұндай оқиғалар болмайды, — деді вице-министр.

Еске салайық, бұған дейін Ішкі істер министрінің орынбасары Санжар Әділов Алматыдағы «Қайрат» — «Реал Мадрид» кездесуі қарсаңында билеттердің заңсыз сатылуына қатысты пікір білдірген еді. 

Бұған дейін матчы кезінде трансляция үзіліп, көрермендер наразылық білдіргені хабарланған.