Gallup сауалнамасы: ЖИ жұмыс өнімділігін арттырғанымен, алаңдаушылық та тудырды

Gallup деректеріне сәйкес, әлемде қызметкерлердің көп бөлігі жұмыс барысында жасанды интеллект технологияларын қолдана бастады. Алайда ЖИ-дің қызметіне бәрінің көзқарасы бірдей емес.

Зерттеу нәтижесінде шамамен әр 10 қызметкердің 3-еуі жасанды интеллектіні тұрақты түрде — күн сайын немесе аптасына бірнеше рет қолданатыны анықталған, ал шамамен екеуі оны анда-санда пайдаланады.

Сонымен қатар, респонденттердің шамамен 40%-ы олардың ұйымдарында ЖИ құралдары енгізілгенін хабарлаған. Олардың үштен екісі бұл технологиялар өнімділік пен тиімділікке оң әсер еткенін айтқан.

Айырмашылық әсіресе қызметкерлер санаттары арасында айқын байқалады. Басшылар ЖИ-дің пайдасын жиі көреді. Менеджерлердің шамамен 70%-ы тиімділіктің артқанын айтса, қатардағы қызметкерлер арасында бұл көрсеткіш жартысынан сәл ғана жоғары. Ең жоғары нәтиже басқару, технология және медицина салаларында байқалса, қызмет көрсету секторында әсері төменірек.

Сонымен қатар қызметкерлердің едәуір бөлігі ЖИ-ді қолданудан саналы түрде бас тартады. Олардың жартысына жуығы мұны бұрынғы әдетпен, «ескі тәсілмен жұмыс істеуді» жөн көрумен түсіндіреді.

Тағы 40%-ы этикалық алаңдаушылықты, деректер құпиялылығына қатысты қауіптерді немесе технологияның пайдалы екеніне күмән келтіруін алға тартады. Кейбірі жасанды интеллектіні сынап көргенімен, оны тиімді деп санамаған, ал басқалары өздерінің жеткілікті дағдылары жоқ екенін айтқан.

Тағы бір маңызды фактор — автоматтандырудан қорқу. Сауалнама бойынша қызметкерлердің 18%-ы алдағы 5 жылда өз жұмысы технологиялар, соның ішінде ЖИ салдарынан жойылуы мүмкін деп есептейді. Бұл көрсеткіш өткен жылмен салыстырғанда жоғары. Жасанды интеллект енгізілген компанияларда бұл алаңдаушылық деңгейі одан да жоғары.

Қосымша Fox News жүргізген сауалнамада қатысушылардың көпшілігі ЖИ салдарынан жұмыс орындары қысқарады деп күтетінін көрсеткен, дегенмен елеулі бөлігі әлі нақты пікір қалыптастырмаған.

Зерттеу 2026 жылдың ақпан айында АҚШ-тағы 23 мыңнан астам жұмыс істейтін адам арасында жүргізілген.

Айта кетейік, Қытай Паркинсонмен ауыратын науқастарға арналған алғашқы ЖИ дәрігерін іске қосты.