Ғалымдар ағзаның қартаюын баяулататын өнімді атады

Tengrinews.KZ парақшасынан алынған ақпаратқа сәйкес, Qazaq24.com хабарлайды..

Ғалымдар қара шоколадтың адам ағзасына әсерін анықтады. Зерттеу Aging журналында жарияланған, - деп хабарлайды Tengrinews.kz тілшісі "Газета.Ru" басылымына сілтеме жасап.

Жаңа зерттеу нәтижесіне сай, мұнда негізгі рөлді какао-бұршағында болатын алкалоид - теобромин атқаруы мүмкін.

Зерттеушілер екі тәуелсіз регистрден алынған 1669 адамның қан үлгілерін талдады. Олар кофеин мен теобромин метаболиттерінің концентрациясын, сондай-ақ, ДНҚ-ның метилденуіндегі өзгерістерге негізделген биологиялық жас көрсеткіштерінің екі маркерін бағалады. Оның бірі жалпы "эпигенетикалық жасты", екіншісі - хромосомалардың ұшындағы қорғаныш бөліктері саналатын теломерлердің күйін көрсеткен.

Нәтижелер бойынша: қанда теобромин деңгейі жоғары адамдарда биологиялық жас орта есеппен хронологиялық жасынан төмен болған. Ал кофеин де, какао мен кофеде кездесетін басқа қосылыстар да мұндай байланыс көрсетпеген.

"Біздің зерттеуіміз қара шоколадтың негізгі компоненттерінің бірі биологиялық қартаюдың баяуырақ жүруімен байланысты екенін анықтады", - деді Корольдік Лондон колледжінің зерттеушісі Джордана Белл.

Ол бұл "көбірек шоколад жеуге" шақыратын ұсыныс емес екенін, әсіресе тәтті шоколадқа қатысты сақ болу керегін атап өтті.

"Дегенмен бұл деректер күнделікті тұтынатын өнімдердің денсаулықты сақтауға және ұзақ әрі сапалы қартаюға қалай әсер етуі мүмкін екенін түсінуге көмектеседі", - деді ғалым.

Авторлар биологиялық жас - ресми бекітілген бір ғана көрсеткіш емес, ағзаның жалпы жағдайын бейнелейтін өлшем екенін айтты: ол неғұрлым төмен болса, тіндер мен ағзалардың қызметі соғұрлым ұзақ сақталады.

Сонымен қатар, шоколадты "қартаюға қарсы құрал" ретінде қарастыруға болмайды: көп мөлшерде ол қант пен майы жоғары, калориясы мол өнім болып қала береді.

"Ендігі қадам - осы байланыстың артында қандай механизмдер тұрғанын және тағамдық метаболиттердің эпигеноммен қалай өзара әрекеттесетінін түсіну", - деді клиникалық генетик Рами Саад.

Ғалымдар теобромин басқа алкалоидтар сияқты гендердің белсенділігін реттеуге ықпал етуі мүмкін деп болжайды, ал бұл өз кезегінде қабыну, зат алмасу және қартаю үдерістеріне әсер етуі ықтимал. Алдағы уақытта зерттеушілер теоброминнің жеке өзі әсер ете ме, әлде какао құрамындағы полифенолдар сияқты басқа компоненттермен бірге ықпал ете ме - соны анықтауды жоспарлап отыр.

Сілтемесіз жаңалық оқисыз ба? Онда Telegram желісінде парақшамызға тіркеліңіз!