Газа секторын басқаратын топ құрамы бекітілді

Дональд Трамп Газа секторындағы өтпелі кезеңді басқаруға арналған халықаралық топтың құрамын бекітті.

 Бұл шешім қақтығысты тоқтатуға бағытталған 20 тармақтан тұратын бейбітшілік жоспарының екінші кезеңін іске асыруды көздейді. Жаңа құрылған Газа әкімшілігінің ұлттық комитетін технократ басшы доктор Али Шаат басқарады. Сол өңірдің тумасы азаматтық институттарды қалпына келтіріп, аймақтағы тұрақтылықты қамтамасыз етуге жауапты болады. Бейбітшілік кеңесінің атқарушы құрамына АҚШ Мемлекеттік хатшысы Марко Рубио, арнайы өкіл Стив Уиткофф, Трамптың күйеу баласы Джаред Кушнер және Ұлыбританияның бұрынғы премьер-министрі Тони Блэр, Дүниежүзілік банк президенті Аджай Банга мен американдық миллиардер инвестор Марк Роуан сынды мамандар кірді. Ал қауіпсіздікті қамтамасыз ету үшін халықаралық тұрақтандыру күштерін генерал-майор Джаспер Джефферс басқарады. Бейбітшілік кеңесі мен Газа әкімшілігінің ұлттық комитеті арасын Жоғары өкіл ретінде болгариялық дипломат Николай Младенов байланыстырады. Сондай-ақ АҚШ, Түркия және Таяу Шығыстың өзге де мамандары тартылмақ. Ақ үй бұл құрылым Газа секторында бейбітшілік пен қалпына келтіру үдерісін жеделдетеді деп отыр.