​Германия тұрғындарына соғысқа дайындық жөнінде жаңа нұсқаулық шықты

Германия Федералдық азаматтық қорғау басқармасы тұрғындар үшін соғыс немесе апат жағдайына дайындық нұсқаулығын жаңартты, деп хабарлайды Евронью́с. 

Енді нұсқаулықта тек табиғи апаттар мен техникалық ақаулар емес, сонымен қатар кибершабуылдар, жалған хабар, диверсия және әскери қауіптер де қарастырылған.

Басқарма тұрғындарға үш күннен бастап он күнге дейінгі азық-түлік және маңызды заттар қорын жинауды ұсынады. Жаңа нұсқаулықта паналау орындарын анықтау, жалған хабарды тану, қорқыныш пен стресс жағдайында өзін ұстау жолдары да көрсетілген.

Президент Ральф Тислердің айтуынша, «кішкентай дайындық қадамдары да адамды дағдарыстан қорғай алады». Қажетті азық-түлік пен дәрі-дәрмек қорын жинау үшін арнайы кеңестер беріліп, «тірі қор» принципі: жаңа өнімдерді күнделікті рационға қосып, ескі өнімдерді қолдану ұсынылады.

Сондай-ақ электр жарығы өшкен жағдайда ақпарат алу үшін батареямен жұмыс істейтін радио, портативті пеш немесе күн панелі, апатты жағдайда қажетті дәрі-дәрмектер қоры болуы қажет.

Бүгін, 15:25