Грузияда ауыр қылмыс жасады деген күдікпен Қазақстан азаматы ұсталды

АСТАНА, 27 сәуір – Sputnik. Грузияда есірткі сақтады деген күдікпен Қазақстан азаматы ұсталды, деп хабарлайды Sputnik Қазақстан тілшісі.

Бұл ақпаратты Қазақстан сыртқы істер министрлігі растады.

"22 сәуірде Грузияның Имерети аймағында Қазақстан азаматы ұсталды. Қолда бар мәліметтерге сәйкес, Грузияның құқық қорғау органдары қазақстандыққа Грузия Қылмыстық кодексінің 260-бабы 1-бөлігі "Есірткі құралдарын заңсыз иемдену және сақтау" бойынша айып тағып отыр", - дейді министрлік.

Сыртқы істер министрлігінің мәліметінше, Қазақстан консулы істің барлық мән-жайын анықтау үшін Грузияның құзыретті органдарымен тікелей байланыста. Мәселе министрліктің бақылауында.

Ал Грузия полициясы есірткіні ірі және аса ірі мөлшерде заңсыз сатып алуға, сақтауға және өткізуге жәрдемдескен деген күдікпен Украина мен Қазақстан азаматтары қолға түскенін хабарлады. Екеуі әртүрлі уақытта қамауға алынған.

"Айыпталушылардың жеке және уақытша тұрып жатқан үйлерін тінту барысында, сондай-ақ тергеу кезінде заттай дәлелдемелер ретінде "метадон" есірткі затының аса ірі мөлшері тәркіленді. Полиция есірткі орау материалдарын да тәркіледі", - деп жазды Грузияның ішкі істер министрлігі.