Гүлсіз және сыйлықсыз Оқу ағарту министрлігі 1 қыркүйекке арналған ережелерді жариялады

1 қыркүйекте мектеп аумағында мұғалімдерге гүл мен өзге де сыйлықтар беруге жол берілмейді. Бұл туралы бүгін ОКҚ брифингінде Оқу-ағарту бірінші вице-министрі Шынар Ақпарова айтты, деп хабарлайды Tengri Edu тілшісі.

Журналистер ата-аналар мұғалімге арналған гүл шоғына қанша қаражат жұмсай алатынын, жалпы бұл дәстүрдің қажет-қажет еместігін сұрады.

"Біз жергілікті атқарушы органдарға тиісті хат жолдадық. Мектеп қабырғасында гүл мен қандай да бір сыйлықтар тарту етуге рұқсат етілмейді. Біз мұны бөлек көрсеттік. Сондықтан бұған ешқандай қажеттілік жоқ", - деді Ақпарова.

Осылайша, ведомство гүл шоғының рұқсат етілген құнын атамады. Оқу-ағарту министрлігінің түсіндірмесі нақты мектеп аумағында берілетін сыйлықтарға қатысты болып отыр.

Бұдан бөлек, 1 қыркүйекте барлық мектепте бірыңғай сынып сағаттары өтеді. Колледждерде кураторлық сағаттар ұйымдастырылады. Ақпарованың айтуынша, олардың ұзақтығы шамамен 45 минут болады.

Бұған дейін Оқу-ағарту министрлігі педагогтарға гүл сыйлауға қатысты басқа ұстаным білдірген болатын. 2024 жылы ведомство мұғалімдерге гүл сыйлауға болатынын айтып, оны құрмет пен ризашылықтың нышаны деп атаған еді. Бұрынғы оқу-ағарту министрі Ғани Бейсембаев та оқушылардан гүл алуды игі дәстүрге балаған болатын.

Еске салсақ, 2026-2027 оқу жылы Қазақстанда 1 қыркүйекте басталып, 25 мамырда аяқталады. Бірінші сынып оқушыларына ақпанда қосымша демалыс қарастырылған.

Google News арқылы жаңалықтарымызды қадағалаңыз