Халық ақша жинай алмайды: Бағаның күрт өсуіне біздің қандай кінәміз бар?

Қазақстан Ұлттық банкінің төрағасы Тимур Сүлейменов жаңа Салық кодексі күшіне енгеннен кейін елде бағалардың уақытша өсуі күтілетінін мәлімдеді. Алайда оның айтуынша, бұл құбылыс ұзаққа созылмайды, экономика біртіндеп тұрақтылыққа оралады, деп хабарлайды Arasha.kz.

Тимур Сүлейменовтің айтуынша, ауқымды салық реформасын жүргізу – уақыт талабы мен экономиканы жаңғырту үшін қажет қадам болған. Дегенмен, оның нәтижесінде инфляциялық қысымның күшеюі мен бағаның қысқа мерзімге өсуі орын алады.

"Бағалар көтеріледі, белгілі бір шарықтау кезеңі болады. Бірақ содан кейін жағдай біртіндеп тұрақтанады. Біз инфляцияның монетарлық бөлігі мен сұраныс жағынан бақылау жүргіземіз, яғни экономикада артық ақша айналымының болмауын қадағалаймыз", – деді Ұлттық банк төрағасы.

Оның айтуынша, реттеуші орган ақша ұсынысын бақылауда ұстап, тұтынушылық сұраныс тарапынан артық қысым туындауына жол бермеуді көздеп отыр.

Тимур Сүлейменов Ұлттық банктің басты мақсаты – азаматтардың жинақ мәдениетін қалыптастыру екенін атап өтті.

"Біз адамдардың артық теледидар немесе тоңазытқыш сатып алғаннан гөрі ақшасын депозитке салғаны тиімді болуын қалаймыз. Яғни біз тұтынуды емес, жинақты ынталандырамыз", – деді ол.

Бұл тәсіл, Сүлейменовтің пікірінше, ішкі нарықтағы қысымды азайтып, экономиканың "қызып кету" қаупін төмендетеді.

Ұлттық банк басшысы салық реформасының негізгі себебін де түсіндірді. Оның айтуынша, соңғы жылдары Қазақстан Ұлттық қордың трансферттеріне шамадан тыс тәуелді болып қалған.

"Шығын көп, ал мұнай-газ секторынан түсетін кіріс жеткіліксіз. Сол себепті біз Ұлттық қордың қаражатына жиі сүйендік. Бұл дұрыс емес – біз болашақтың қаржысын қазір жұмсап жатырмыз. Сондықтан Үкімет ірі салық реформасын жүргізуге мәжбүр болды", – деді Сүлейменов.