Халықаралық сарапшы Қазақстанның отын энергетика кешенін цифрландыруға көмектеседі

АСТАНА, 9 ақпан – Sputnik. Энергетика министрі Ерлан Ақкенженов жасанды интеллект саласындағы танымал халықаралық сарапшы, ғалым және кәсіпкер Ли Кай-Фумен кездесті.

Кездесу барысында тараптар отын-энергетика кешенін цифрлық трансформациялаудың өзекті мәселелерін, жасанды интеллектіні дамытудың әлемдік үрдістерін, сондай-ақ энергетика саласы нысандарының тиімділігін, сенімділігі мен қауіпсіздігін арттыру үшін жасанды интеллект технологияларын қолдану мүмкіндіктерін талқылады.

Ли Кай-Фу қолданбалы жасанды интеллект шешімдерін енгізудің халықаралық тәжірибесімен және ірі индустриялық жүйелерде жасанды интеллектіні пайдалану тәсілдерімен бөлісті.

"Кездесу қорытындысы бойынша тараптар арасында Қазақстанның отын-энергетика кешенін цифрландыру және жасанды интеллект технологияларын енгізу саласындағы өзара іс-қимылды дамытуға бағытталған ынтымақтастық туралы меморандумға қол қойылды", - деп жазылған хабарламада.

Меморандум аясында тараптар энергетикада қолданбалы жасанды интеллект шешімдерін енгізу, соның ішінде салада қолдану үшін жасанды интеллект-агентін құру бойынша пилоттық жобаны пысықтау және іске асыру бойынша ынтымақтастықты дамытуға ниетті.