Халықтың борыштық жүктемесінің өсуін шектеу үшін макропруденциялық құрал енгізіледі ҰБ

— Ұлттық банктің бастамасымен 2026 жылғы 1 қаңтардан бастап бөлшек несиелеуге қатысты дифференциалды салық салу тетігі енгізіледі. Осылайша, банктердің бөлшек несиелеуден және өзге де табыстарынан түсетін КТС мөлшерлемесі 25 пайыз деңгейінде белгіленеді. Ұлттық банк агенттікпен (Қажы нарығын реттеу және дамыту агенттігі) бірлесіп, қабылданған шараларды одан әрі іске асыра түседі. Сондай-ақ, тұтынушылық кредиттеу қарқынын және инфляция деңгейін төмендетуне бағытталған қосымша тетіктер әзірлейді, — деді Тимур Сүлейменов.

Оның айтуынша, жеке тұлғалар несиелеріне қатысты секторалды контрциклдік капитал буферін одан әрі арттыру мәселесі пысықталады. Әдістемені жетілдіру аясында борыштық жүктеме коэффициентін есептеу кезінде қолданылатын табыс өлшемдерін қайта қарау жүргізіледі. Бұдан бөлек, халықтың жиынтық борыштық жүктемесінің өсуін шектеу мақсатында жаңа макропруденциялық құрал — қарыздың табысқа қатынасы коэффициенті енгізіледі. BNPL секторы, яғни бөліп төлеу жүйесі бойынша реттеу тәсілдері әзірленеді.

— Аталған шаралардың барлығы, сөзсіз, инфляциямен күреске өз үлесін қосады. Алайда, ақша-кредит саясатының негізгі құралы — базалық мөлшерлеме болып қала береді. Дәл осы көрсеткіш ақша-кредит шарттарының деңгейін айқындайды. Сондықтан бүгін базалық мөлшерлемені ақша-кредит саясатының қалыпты қатаң ұстанымын қалпына келтіретін деңгейге дейін көтердік. Ұлттық банк инфляцияны төмендету үшін ақша-кредит саясаты аясындағы барлық қажетті шараны қабылдайды. Төмен және тұрақты инфляция — еліміздің іскерлік ортасын дамытуға, халықтың әл-ауқатын арттыруға және еліміздің экономикалық өсімін қамтамасыз етуге қосар басты үлесіміз, — деді Тимур Сүлейменов.

Бұған дейін Ұлттық банкінің Ақша-кредит саясаты комитеті базалық мөлшерлемені +/- 1 п. т. дәлізімен жылдық 18 пайыз деңгейінде белгілеу туралы шешім қабылдаған еді.

Сонымен қатар осыған дейін Сүлейменов ақша-кредит шарттары инфляцияны тұрақтандыруға жеткіліксіз болса қосымша шаралар қаралатынын айтты.