Иллинойс университетінің бұрынғы қызметкері Трампқа қауіп төндіргені үшін ұсталды

Бұл туралы Fox News телеарнасы ФТБ мәлімдемесіне сілтеме жасап хабарлаған.

«Күдіктіні ұстауға дейін бір ай бойы ФТБ мен Құпия қызмет, сондай-ақ Иллинойс университетінің полициясы бірлескен тергеу амалдарын жүргізді. Лопес қазіргі президентке қауіп төндірген болуы мүмкін деген болжам бар. Осы фактіге байланысты оған федералдық айып тағылды», деп жазылған мәлімдемеде.

Қоқан-лоққының нақты мазмұны әзірге жарияланған жоқ. Fox News-ке пікір білдірген ФТБ басшысы Кэш Пател Лопестің әрекетін «жиіркенішті» деп атап, мұндай істерге «америкалық қоғамда орын жоқ» екенін айтты.

Айта кетейік, Дональд Трампқа өткен жылы екі рет қастандық жасалған. Бірінші оқиға шілде айында Батлер қаласында өткен сайлауалды митинг кезінде болған. Онда мерген атқан оқ саясаткердің құлағын жанап өткен.

Көп ұзамай президент Дональд Трампты өлтірмек болған адамның 20 жастағы Томас Мэттью Крукс екені анықталды.

Ал былтырғы қыркүйекте АҚШ президентіне тағы шабуыл жасалды.