Instagram арқылы үй өртеп , табыс тапқысы келген астаналық түрмеге түсті

Астанада Instagram әлеуметтік желісі арқылы «қосымша табыс» табуға келіскен қала тұрғынына қатысты сот үкімі шықты, – деп хабарлайды Aikyn.kz сайты.

Тергеу мәліметінше, айыпталушы 2 000 АҚШ доллары көлеміндегі сыйақы үшін тұрғын үйге өрт қоюға келіскен. Ол үй ішінде адамдардың болғанына қарамастан, әрекетінің қауіпті салдарын түсіне отырып, алдын ала дайындалған жанғыш заттарды үйге қарай лақтырған.

Осылайша, азаматтардың өмірі мен денсаулығына нақты қауіп төндірген. Бірақ қылмыс сыртқы жағдайларға байланысты соңына дейін жүзеге аспаған.

Сот айыпталушыны бөтеннің мүлкін жоюға оқталу бабы бойынша кінәлі деп таныды. Бұрынғы соттылығын ескере отырып, оған 3 жыл 6 ай мерзімге бас бостандығынан айыру жазасы тағайындалды.

Қала прокуратурасы әлеуметтік желілер арқылы ұсынылатын күмәнді табыс көздеріне сенбеуге шақырып, мұндай әрекеттердің қылмыстық жауапкершілікке әкелетінін ескертті.