Интерпол іздеген Түркия азаматы Алматыда ұсталды

Алматы қаласында жеңгетайлық жасағаны үшін Интерпол арқылы іздеуде жүрген Түркия азаматы ұсталды, – деп хабарлайды Aikyn.kz сайты. 

Қашып жүрген кезде ол жынысын ауыстырып, әйелге айналған.

Бұл туралы Қазақстан Республикасының Ішкі істер министрлігі Қылмыстық полиция департаментінің бастығы Қанат Нұрмағамбетов мәлімдеді. Оның айтуынша, оқиға өткен жылдың қазан айында болған.

Мәліметке сәйкес, күдікті Алматы әуежайында Баку қаласына ұшып кетпек болған кезде ұсталған. Ол жеңгетайлық жасады деген күдікпен Интерпол арқылы халықаралық іздеуде болған.

Күдіктіні уақытша ұстау изоляторына қамау барысында оның жынысын ер адамнан әйелге ауыстырғаны анықталған. Қазіргі уақытта оны Түркияға экстрадициялау мәселесі қарастырылып жатыр.

Қанат Нұрмағамбетовтің айтуынша, өткен жылы басқа мемлекеттердің құқық қорғау органдарының сұрауы бойынша Қазақстанда іздеуде жүрген 690 адам ұсталған. Ал биылғы жылдың басынан бері 60 адам қолға түскен.