Иран АҚШ пен Израиль кемелеріне Ормуз бұғазы арқылы өтуге тыйым салуы мүмкін

Иран парламентінің комитеті америкалық, израильдік және басқа да "дұшпан" кемелердің Ормуз бұғазы арқылы өтуіне тыйым салатын заң жобасын қарастырып жатыр. Бұл туралы Иранның Fars ақпарат агенттігі депутатқа сілтеме жасап хабарлады, деп жазады Tengrinews.kz.

Ұсынылған заң жобасында белгіленген шектеулерді бұзғаны үшін кеме жүгі құнының 20 пайызына дейінгі мөлшерде айыппұл салу көзделген.

Ирандық депутат заң жобасы әлі де сарапшылардың қарауында екенін және парламент жобаны түпкілікті пысықтағанға дейін мамандарды өз ұсыныстарын беруге шақырғанын айтты.

Мұнай нарығы бұл жаңалыққа бірден ден қойды: трейдерлер Fars агенттігінің хабарламасын жақын арада Парсы шығанағы елдерінен мұнай экспорты шектеулі болып қалатынының белгісі ретінде қабылдады, деп жазады Bloomberg.

Сонымен қатар бейсенбі, 6 тамызда йемендік хуситтер Йемендегі Сауд Арабиясы әскерилері шоғырланған жерлерге шабуыл жасағанын мәлімдеді. Бір күн бұрын олар Қызыл теңіздегі Янбу мұнай экспорттық терминалының маңында саудтық танкерге шабуыл жасағаны туралы хабарлаған болатын.

Бұған дейін АҚШ президенті Дональд Трамп бұл Иран үшін "жақсы құжатқа қол қоюдың" "соңғы мүмкіндігі" екенін айтты. Бұған дейін ол тағы да соққы жасаудан бас тартып, Парсы шығанағы аймағындағы одақтастарының өтініші бойынша келіссөздерді жалғастыруға уәде берген болатын.

Google News арқылы жаңалықтарымызды қадағалаңыз