Ирандық футболшылар Аустралиядан саяси баспана сұраған өтініштерін қайтарып алды

БАҚ мәліметінше, екі футболшы мен команда қызметкері бұған дейін отанында қудалануы мүмкін деген қауіпке байланысты баспана беру туралы өтініштерін кері қайтарып алған. Мұндай қауіптің туындауына команда Азия кубогы турнирінде Иранның мемлекеттік әнұранын орындаудан бас тартуы себеп болған.

Иранның мемлекеттік телерадио компаниясы сенбі күні спортшылардың Аустралиядан баспана сұрау өтінішінен бас тартып, Малайзияға бағыт алғанын хабарлады. Эфирде әйелдердің ұшақ бортына мініп жатқан сәті бейнеленген сурет көрсетілген.

Жексенбі күні бұл ақпаратты Аустралияның ішкі істер министрі Тони Бёрк растады.

Оның айтуынша, түнде Иран құрамасының үш мүшесі елге қайтып жатқан командаға қосылу туралы шешім қабылдаған. Министр сондай-ақ Аустралия билігі хабардар етілгеннен кейін спортшыларға бірнеше рет мүмкін болатын әрі қарайғы әрекеттерді талқылау ұсынылғанын айтты.

Иран әйелдер құрамасы Аустралияның Квинсленд штатындағы Голд-Кост стадионында өткен турнирге қатысу үшін сол елде болған.

Жарыс кезінде, 28 ақпанда АҚШ пен Израиль Иранға қарсы әскери операция бастаған.

Ал алғашқы матчта ирандық футболшылар елдің мемлекеттік әнұранын орындаудан бас тартқаннан кейін Иран мемлекеттік телерадио компаниясының жүргізушісі оларды «сатқындар» деп атаған. Кеңінен тараған мәлімдемесінде ол ойыншылардың әрекетін ар-намыстың ең төменгі деңгейі деп бағалап, олар қатаң жазалануы тиіс екенін айтқан.

Осы мәлімдемелерден кейін кәсіби футболшылардың FIFPRO халықаралық қауымдастығы  FIFA мен Азия футбол конфедерациясын спортшыларды қорғау үшін шара қабылдауға шақырды. Бұған аустралиялық бұқаралық ақпарат құралдарында ойыншыларды Иран билігінің өкілдері бақылап жүргені туралы хабарлардың тарауы себеп болған.

Өз кезегінде Иран футбол федерациясы Аустралияны ойыншыларды «ұрлап әкетті» деп айыптап, оларды отанына қайтудан бас тартуға мәжбүрледі деп мәлімдеді.

Айта кетейік, Иран құрамасының футболдан әлем чемпионатына қатыспайтыны белгілі болды.