Ирландия тұрғыны 2800 шақырымды скейтбордпен жүріп өтті

Ирландия тұрғыны 2800 шақырымды скейтбордпен жүріп өтті. Бұл жол ең ұзақ туристік бағыт саналады. Бекки Гилмордың мақсаты – өз-өзіне қол салатындардың жағдайына жұрт назарын аудару.

26 жастағы әйел күніне 60 шақырымға дейін жүріп отырған. Сапарын 5 ай бұрын бастаған ол күн суытқанға дейін тағы 300 шақырым жол жүрмек. 

Бекки Гилмор, Лимерик қаласының тұрғыны:

- Бірнеше жыл бұрын жақын досым көз жұмды. Теңіз жағасында скейтборд айдау біздің сүйікті ісіміз еді. Өз қайғымды осындай жолмен жеңілдеткім келді. Айналадағы адамдарды өз-өзіне қол салудың алдын алу жөнінде хабардар етемін. Ұқсас оқиғаларды бастан кешіріп, жақынынан айырылған жандарға қолдау көрсетуге тырысамын.