Исландия әлемдегі ең нашар фотографты тауып, оған 22,5 миллион теңге төледі

Icelandair әуекомпаниясы "ең нашар фотографты" тауып, оны Исландия бойынша 10 күндік саяхатқа жіберді. Ерекше байқаудың жеңімпазы Париж маңында тұратын Бланш Мортемар болды. Жобаға қатысқаны үшін ол 50 мың доллар (шамамен 22,5 миллион теңге) алды, сондай-ақ әуекомпания ұшу билетін, тұру және көлік шығынын өтеп берді, деп хабарлайды Tengri Travel.

Ең нашар фотограф қалай таңдалды?

Байқау 2026 жылдың сәуірінде басталды. Icelandair адамдарға өзін немесе суретке онша түсіре алмайтын таныстарын ұсынуды тапсырды.

Жобаның мақсаты - тәжірибесіз фотографтың өзі Исландияда сәтті сурет жасай алатынын көрсету. Сонымен қатар әуекомпания жасанды интеллект арқылы жасалған суреттердің танымалдылығына назар аудартып, саяхаттан алынатын шынайы әсерді көрсеткісі келді.

Байқауға 176 елден 127 642 өтінім түсті. Іріктеу мен сұхбаттан кейін ұйымдастырушылар Бланш Мортемарға тоқтады.

Instagram-дағы бұл жарияланымды көру

Icelandair (@icelandair) жариялаған жазба

Icelandair мәліметінше, ол команданы суретке нашар түсіру қабілетімен таңғалдырған. Бұл ретте ұйымдастырушыларға оның мінезі мен саяхатқа көзқарасы ұнаған.

Бланш жеңісін әзілмен қабылдады.

"Осы уақытқа дейін достарым мен отбасым мен түсірген суреттер неге көңіл көншітпейтінін сұрайтын. Соңында оның жауабын тапқаныма қуаныштымын: мен осы рөлге дайындалдым", - деді ол.

Жеңімпаздың айтуынша, бұл жоба кемелсіздікке арналғандықтан, оған сай келген.

Сондай-ақ Бланш Исландияның табиғаты қызықтырғанын айтты. Ол елдің әр суретте неге әртүрлі көрінетінін түсінбейтінін айтып әзілдеді: бір кадрда - мұздық, екіншісінде - жанартау, қара жағажай мен сарқырама.

"Мен Исландияны кәсіби фотографқа тән сеніммен, бірақ шын мәнінде ондай емес адамның дағдыларымен түсіремін", - деді ол.

10 күндік саяхаттан бөлек, Icelandair Бланшқа оның уақыты, суреттері және жобаға байланысты шығындары үшін 50 мың доллар (шамамен 22,5 миллион теңге) бөлді. Ұшу, тұру және көлік шығынын да әуекомпания төледі.

Сапар барысында қатысушы жаяу серуендеуге, жорыққа және табиғаттағы басқа да белсенділікке қатысты.

Қазір ұйымдастырушылар саяхат күнделігі мен Бланштың суреттерін жариялап жатыр. Бұл ретте Icelandair: "сапалы суреттерге кепілдік берілмейді" деп алдын ала ескертеді.

Бұл эксперимент мұнымен аяқталмайды. Icelandair Бланш сапарының нәтижелеріне арналған "Исландия әлемдегі ең нашар фотографтың көзімен" атты көрме дайындап жатыр.

Исландия бойынша саяхаты кезінде ол 5 484 сурет түсірген. Олардың ішінен ұйымдастырушылар алдын ала көрсетілімге бірнеше суретті таңдап алды - олардың арасында бұлдыр, қисық және күтпеген жерден өте әдемі шыққан кадрлар бар.

Бланш жұмысының нәтижесін оның алғашқы жеке фотокөрмесінен толық көруге болады. Ол 11-12 қыркүйекте Лондонда өтеді.

Бізді Google-дың негізгі дереккөздер тізіміне қосыңыз