Испанияда туристерге пәтерді жалға беру ережесі өзгерді

Испания билігі лицензиясы жоқ әрі жалға беруге тыйым

салынған туристік тұрғын үйлердің жарнамасын жариялағаны үшін Airbnb компаниясына 65 миллион еуро көлемінде айыппұл салды. Осылайша Пиреней түбегіндегі мемлекет туристік пәтерлерге қатысты қатаң саясат ұстанып, Барселонада қысқа мерзімді жалға беруді 2028 жылға дейін кезең-кезеңімен жоюды жоспарлап отыр. Ресми Мадрид бұл шешімді тұрғын үй тапшылығымен және пәтер ақысының күрт қымбаттауымен түсіндіреді.

Испания жыл сайын жүз миллионға жуық мейман қабылдайтын әлемдегі ең ірі туристік бағыттардың бірі. Туризм ел экономикасының маңызды тірегі болғанымен, соңғы жылдары бұл сала тұрғын үй нарығына елеулі қысым түсіре бастады. Әсіресе Airbnb секілді қысқа мерзімді жалға беру платформалары жергілікті тұрғындарға арналған үйлер санын азайтып, жалдау бағасының күрт өсуіне ықпал еткен. Ресми деректерге сәйкес, бүгінде Испанияда туристерге қысқа мерзімге жалға берілетін пәтерлер саны шамамен 400 мыңға жетті. Ал бірқатар ірі туристік өңірлерде тұрғын үй қорының 30 пайыздан астамы, яғни әрбір үшінші баспана жергілікті халыққа емес, туристерге ұсынылады.

Хуан Антонио, кәсіпкер:

- Шынын айтсам, пәтерімді туристерге жалға беру әлдеқайда табысты. Барселонадағы бір бөлмелі пәтерім бір аптаның ішінде шамамен 700 еуро кіріс әкеледі. Сұраныс жоғары кезде одан неге бас тартуым керек?

Патриция Молина, студент:

- Қалада тұрғын үй бағасы шарықтап кетті, баспана табу барған сайын қиындап барады. Сондықтан биліктің туристерге жалға пәтер беруді шектеу туралы шешімі орынды деп есептеймін.

Испания бұған дейін Booking.com платформасынан 4000-нан астам заңсыз туристік жалға беру тізімін алып тастауды талап еткен еді. Тұтынушылар құқығын қорғау министрлі, бұл жарнамалардың міндетті тіркеу нөмірі болмаған немесе олар қысқа мерзімді жалға беру жөніндегі  заң талаптарына сай келмеген деп мәлімдеді. 2025 жылы билік туристік жалға беру нарығын реттеу шараларын күшейтіп, онлайн платформалардың қызметіне жүйелі бақылау енгізді. Осы ретте лицензиясы жоқ немесе жалға беруге тыйым салынған туристік тұрғын үйлердің жарнамасын жариялаған Airbnb компаниясына 65 миллион еуро айыппұл салынды.

Валерия Гасеано-Виверо, заңгер:

- Бұл шара онлайн платформалардың жауапкершілігін арттырумен қатар тұрғын үйлерді туристік бизнес нысанына айналдыру тәжірибесін шектеуге бағытталған. Үкімет осылайша қысқа мерзімді жалға беру салдарынан азайған тұрғын үй қорын қалпына келтіріп, жалдау нарығындағы баға өсімін тұрақтандыруды көздейді. 

Сарапшылардың пікірінше, Испанияның бұл саясаты Еуропаның өзге туристік қалаларына да үлгі болуы мүмкін. Қазір Париж, Амстердам, Рим секілді мегаполистер қысқа мерзімді жалға беруді шектеп, лицензия талаптарын күшейтіп отыр. Барселонада жүргізілген зерттеулер туристік пәтерлер саны азайған аудандарда тұрғын үй нарығындағы бағаның шарықтау қарқыны бәсеңдегенін және жергілікті тұрғындардың қала орталығына қайта орала бастағанын көрсеткен. Дегенмен, бұл шешімге қарсы тарап та аз емес: шағын инвесторлар мен платформа өкілдері  бұл шаралар туризмге кері әсер етіп, көлеңкелі нарықты күшейтуі мүмкін деп алаңдайды.

Аида Қыдырбай, Дмитрий Рогач