Кадрлық өзгеріс: Мұратжан Мұсайбеков АМӨЗ дің жаңа директоры болып ​тағайындалды

«ҚазМұнайГаз» компаниясы хабарлағандай, кәсіпорынның жаңа басшысын тағайындау туралы шешімді қатысушылардың кезектен тыс жалпы жиналысы қабылдады. Ұжымға Мұратжан Мұсайбековты басқарма төрағасының орынбасары Әсет Мағауов таныстырды.

Мұратжан Мұсайбеков бұған дейін «ҚазМұнайГаз» жүйесінде жетекші қызметтер атқарған. Ол мұнай өңдеу және мұнай-химия саласындағы жобаларды қадағалады, мұнай өңдеу жөніндегі басқарушы директор болды, «ҚазМұнайГаз – өңдеу және маркетинг» компаниясының бас директорының орынбасары қызметін атқарды, сондай-ақ KPI Inc. басқарма төрағасының бірінші орынбасары болды.

Жаңа басшыға кәсіпорынның операциялық тиімділігін арттыру, жеңіл мұнай өнімдерінің шығымын көбейту, өндірістің сенімділігі мен энергия тиімділігін көтеру, экологиялық жобаларды жалғастыру, қызметкерлердің қауіпсіздігін қамтамасыз ету және зауыттың үздіксіз жұмысын ұйымдастыру міндеті жүктелді.

Сонымен қатар, 2025 жылдың сәуірінен бері зауытты басқарған Қуаныш Бишімовтың өкілеттігі аяқталды.

Кеше «Ақ Жайық» басылымы Telegram-арналарға сілтеме жасап Мұратжан Мұсайбековтың тағайындалуы мүмкін екенін хабарлаған еді. Бүгін бұл ақпарат ресми түрде расталды.

Алайда жұртшылық Мұсайбековтар фамилиясын тек мұнай саласымен ғана емес, басқа оқиғамен де байланыстырады. Мұратжан – 2021 жылы алаяқтық үшін сотталған бұрынғы мәдениет және спорт вице-министрі Сәкен Мұсайбековтың туған ағасы.

Сол кезде Сәкен Мұсайбеков Дубайға ұшар алдында Астана әуежайында ұсталған. Кейін сот оны кінәлі деп танып, 62,394 млн теңге көлемінде айыппұл салды, ақшасы мен Hermès сөмкесін тәркіледі.

Дегенмен Сәкен Мұсайбековтың мансабы мұнымен аяқталған жоқ. Айыппұлды төлегеннен кейін ол алдымен Қазақстан хоккей федерациясын басқарды, кейін «Барыс» хоккей клубының бас директоры болды.

«Бауыр бауыр үшін жауап бермейді» дейді, дегенмен атышулы фамилия екеуіне де бірге алып жүретін жүк болып қала бермек.

Кеше, 13:52