Канада АҚШ қа қарсы долларға доллар қағидаты бойынша қарымта баж салығын енгізді

Оттава мен Вашингтон арасындағы сауда текетіресінің ушығуы аясында Канада америкалық тауарларға бірқатар қарымта баж салығын енгізетінін жариялады, деп хабарлайды Tengrinews.kz тілшісі Euronews басылымына сілтеме жасап.

Сейсенбі күні Канаданың қаржы министрі Франсуа-Филипп Шампань Оттава АҚШ-тың жаңа баждарына "теңбе-тең, нақты әрі ойластырылған түрде" - "долларға доллар, мөлшерлемеге мөлшерлеме" принципімен симметриялы тарифтер енгізу арқылы жауап беретінін мәлімдеді.

"8 қыркүйектен бастап Канада құны 27,6 миллиард канада долларын (шамамен 20 миллиард АҚШ доллары - ескертпе) құрайтын АҚШ импортына 15, 25 немесе 50 пайызға дейінгі мөлшерде қарымта баж салығын енгізеді", - деді ол.

Бұл қадам сенбі күні екі ел арасындағы сауда келіссөздерінің тоқтап қалуынан кейін, шамамен 28 миллиард канада долларының экспортына әсер еткен АҚШ-тың 50 пайыздық баждарына жауап ретінде жасалды.

Канадалық жұмысшылар мен бизнеске жалпы сомасы 7,5 миллиард канада доллары көлемінде көмек пакетін де жариялаған Шампань Трамп әкімшілігі ұсынған шарттар "экономикалық тұрғыдан тиімсіз, әділетсіз және түптеп келгенде қабылданбайтын" болғандықтан, Канада келіссөздерді тоқтатуға мәжбүр болғанын айтты.

Ол өршіп бара жатқан сауда текетіресін "Канадаға тасталған бұрын-соңды болмаған сын-қатер" деп атап, елдің бұған "лайықты жауап беретінін" баса айтты.

"Біз жұмысшыларымызды, компанияларымызды және салаларымызды кез келген жағдайда және қанша уақыт қажет болса, сонша қолдайтын боламыз", - деп атап өтті Канада қаржы министрі.

Дүйсенбі, 24 тамызда АҚШ президенті Дональд Трамп Оттаваны "АҚШ-ты жылдар бойы тонап келді" деп айыптап, 2027 жылдан бастап канадалық автомобильдерге салынатын баж салығын екі есе арттырамын деп сес көрсетті.

"2027 жылдың бірінші қаңтарынан бастап барлық автомобильге, үлкенді-кішілі жүк көліктеріне, автобөлшектер мен болатқа салынатын тарифтер 50 пайызға дейін көтеріледі", - деп жазды Трамп Truth Social әлеуметтік желісінде.

Қазіргі уақытта құрамында америкалық емес үлесі бар автомобильдерге АҚШ-тың 25 пайыздық баждары қолданылады.

Google News арқылы жаңалықтарымызды қадағалаңыз