Каспий құбыржелісі консорциумының экспорты желтоқсан айында артады

Каспий құбыржелісі консорциумы (КҚК) желтоқсан айында CPC Blend маркалы мұнай экспортын тәулігіне 1,7 млн баррельге дейін ұлғайтуды жоспарлап отыр. Қараша айындағы жоспар – тәулігіне 1,45 млн баррельді құраған, деп хабарлайды Egemen.kz.

Фото: pinterest.com

Reuters дерегінше, экспорттың өсуі екі негізгі факторға байланысты:

- Теңіз кен орнында қазан-қараша айларында жүргізілген жөндеуден кейін өндіру көлемінің артуы;

- Ресейлік өндірушілердің қосымша жеткізілімдері.

Сонымен қатар, нақтыланған жөнелту жоспары бұдан да жоғары болуы мүмкін. Себебі КҚК-ның Оңтүстік Озереевкадағы теңіз терминалындағы тоқтатулар қараша айындағы жоспардың толық орындалуына кедергі келтірген, ал бірқатар көлемдер желтоқсанға ауыстырылып жатыр.

Каспий құбыржелісі консорциумы Қазақстан мұнайының 80%-дан астамын экспорттауды қамтамасыз етеді. Құбыр желісі Теңіз және басқа да кен орындарын Новороссийск маңындағы Оңтүстік Озереевка теңіз терминалымен байланыстырады.

Акционерлер құрамы: Ресей – 31%, Қазақстан – 20,75%, Chevron – 15%, қалған үлес – жеке компаниялар.

Деректерде айтылғандай, КҚК баспасөз қызметі жедел экспорт көлемдеріне түсініктеме беруден бас тартқан.