Катар Баб эль Мандеб бұғазының жабылуына байланысты бүкіл әлем үшін апат болатынын ескертті

Қатар Баб-эль-Мандеб бұғазын ашық ұстау үшін халықаралық күш-жігер жұмсауға шақырды. Ормуз бұғазындағы қоршау жалғасып жатқан тұста тағы бір маңызды кеме қатынасы жолынан айырылу "апатқа" әкелетінін ескертті, деп хабарлайды Tengrinews.kz тілшісі Euronews сайтына сілтеме жасап.

Сейсенбі күні Дохада өткен брифингте Қатар Сыртқы істер министрлігінің Қоғаммен байланыс және БАҚ департаментінің директоры Ибрахим бин Султан әл-Хашми Қызыл теңізге кіреберістің жабылуы Ормуз бұғазындағы қоршаудан туындаған іркілістерді одан әрі қиындататынын мәлімдеді.

"Әлем онсыз да Ормуз бұғазының жабылуынан зардап шегіп отыр, сондықтан бұған Баб-эль-Мандебтің де қосылуына жол бере алмаймыз", - деді әл-Хашми.

"Бұдан бүкіл әлем зардап шегеді, бұл жаһандық ауқымдағы апат болады", - деп толықтырды ол.

Ол халықаралық теңіз жолдарын бұғаттау "жаңа қалыпты жағдайға" айналмауы тиіс екенін атап өтіп, елдерді бұған жол бермеу үшін бірлесе әрекет етуге шақырды.

Бұл ескерту Иран қолдайтын хуситтердің Қызыл теңіздің оңтүстік бөлігіндегі тағы бірнеше аралды басып алып, Баб-эль-Мандеб ауданы мен оның маңындағы ықпалын күшейткеннен кейін жасалды.

Йеменнің халықаралық деңгейде танылған үкіметі мен хуситтердің өкілдері дүйсенбі күні үкіметке одақтас әскерлер шегінгеннен кейін топтың Үлкен және Кіші Ханыш аралдарын бақылауына алғанын мәлімдеді. Бұған дейін хуситтер Моха жағалаудағы портын және бұғаздың кіреберісіндегі Перим аралын иеленген болатын.

Бұл шабуылдар Иранмен арадағы соғыс жағдайында энергия ресурстарын жеткізуге түсетін қысымды одан ары арттырды. Арабия түбегінің екінші жағында АҚШ пен Иранның қоршауы Ормуз бұғазы арқылы өтетін кемелер қозғалысын бұзып үлгерді.

Араб тілінен аударғанда "Қайғы қақпасы" деген мағынаны білдіретін Баб-эль-Мандеб Аден шығанағын Қызыл теңізбен байланыстырады, сондықтан Азия мен Еуропа арасында Суэц каналы арқылы қатынайтын кемелер осы бұғаз арқылы өтуі тиіс.

Сауд Арабиясының "Шығыс – Батыс" мұнай құбыры королдікке мұнайды Қызыл теңіздегі порттарға айдау арқылы Ормуз бұғазын айналып өтуге мүмкіндік береді, бірақ ол жерден оңтүстікке қарай бет алған танкерлер бәрібір Баб-эль-Мандеб арқылы өтуге мәжбүр.

Бізді Google-дың негізгі дереккөздер тізіміне қосыңыз