Кедергісіз орта білім

Елде мектеп жасындағы 130 мыңнан астам бала ерекше білім алуды қажет етеді.

Оның ішінде 80 мың жеткіншек жалпы орта білім беретін оқу ошақтарында дәріс алып жүр. 6 мыңға жуық білім мекемесі инклюзивті бағдарламаға сай бейімделген. Жергілікті атқарушы органдар өңірлердегі мектептердің 90 пайызында ерекше қажеттілігі бар балалар үшін жағдай жасалған деп отыр. Елордадағы мектептердің біріне біздің тілшілеріміз бас сұқты. 

Мектеп жасындағы балалар - 130 мыңнан астам

Оқушылар саны - 80 мың

Инклюзивті білім - 6 мың мектеп

Жабдықталған - 90%

Елордадағы жаңа №116 «Келешек мектебі» биыл 1 қыркүйекте есігін ашты. Бұндағы 3 мыңға жуық оқушының қатарында ерекше білімді қажет ететін 54 бала бар. Барлығына тең мүмкіндікпен кедергісіз білім беру – мектеп ұстаздарының ұстанымы. Кіреберістен бастап инклюзивті орта ұйымдастырылған. Қозғалысында қиындығы бар, көру, есту қабілеті нашар оқушылар үшін пандус, сары жолақ, арнайы шақыру тетіктері орнатылған. 

Эльмира Ілиясова, №116 мектеп директоры:

- Мектебімізде 3 дефектолог, 3 логопед, 4 педагог-психолог, 15 педагог-ассистент қызмет атқаруда. Балалардың саны өсіп келе жатыр. Бірақ біз ерекше баланы ешқандай бөлмей, бәріне теңдей білім беруге атсалысудамыз. Балалар жалпы білім беретін мектеп болғаннан кейін барлық оқушылар сияқты кабинеттерде отырады. Оларға ерекше көңіл бөлініп логопедпен, дефектологпен, психологпен арнайы сабақтар ұйымдастырылуда.

Тіл кемістігі бар, мінез-құлқында ауытқушылық немесе зиятының жеңіл бұзылысы анықталған балалар бастауыш сыныптарда басым, дейді мамандар. Түзету дәрістері күнделікті жеке және топтық түрде өткізіледі. 

Әсел Советқызы, №116 мектеп педагог-дефектологы:

- Біз әрбір баланың ерекшелігін ескере отырып соны түзетуге барымызды салып жұмыс жасайтын маманбыз. Сонымен қатар баланың анатомиясын, физиологиясын, психологиясын жан-жақты оқыған маман болғандықтан 05-28 Жеке, бейімделген бағдарлама, түзету бағдарламаларын жасап балаларға барынша қолдау көрсетіп түзетіп отырамыз. 

7-сынып оқушысы Димаш сұхбат бергенді ұнататынын айтты. Өзі оқу озаты. Сүйікті пәндері алгебра мен ағылшын тілі болса, сабақтан тыс жүзу, ән айту үйірмелеріне барады. Қатарластары әрқашан қолдау білдіретініне разы.

Дінмұхамед Дәулеткелдіұлы, №116 мектептің 7-сынып оқушысы:

- Сынып жақсы, ұйымшыл. Балалары көмектесуге ұмтылып тұрады әрқашан қолдауларын білдіріп. Класс жетекшіміз де өте ашық жарқын, білімді, өте мейірімді кісі. 

Жуырда заң да жаңарады. Елде мүмкіндігі шектеулі балаларды кешенді қолдау туралы заң әзірленіп, Үкімет қаулысымен мақұлданды. Құжат енді Парламентке жолданады.  

Лаура Бұтабаева, Арнайы және инклюзивті білім беруді дамытудың ұлттық ғылыми – практикалық орталығының директоры:

- Ол заң қабылданған жағдайда бұл салаға өте жаңағы бала үшін тиімді өзгерістер жоспарланып отыр. Ол бірінші кезекте неғұрлым ерте кезеңде балаларды анықтап, даму траекториясын ерте анықтауға бағытталған цифрлық платформаның болуы. Денсаулық сақтау, Әлеуметтік қорғау және білім беру саласы бірігіп жұмыс жасау арқылы ғана ол кешенді қолдауды жүзеге асыра аламыз. Бізде ұйымдастырушылық нормативтік-құқықтық қамтамасыз ету этапынан сәтті өтіп жатырмыз, келесі кезең қалай тиімді жүзеге асыру кезеңіне өтуіміз керек. 

Денсаулығында кінәраты бар бала қала мектебінде де, ауыл мектебінде де бар. Мақсат – барлығының білім алуына тең жағдай жасау. Оған жаңа заңның септігі тиеді, - дейді мамандар. Цифрлық платформа ерекше қажеттілігі бар әр балаға көмектің қаншалықты тиімді көрсетіліп жатқандығын бақылауға көмектеседі.

Рухани Әбдірахман