Келіссөздер жаңа кезеңге өтті: АҚШ пен Иран не туралы мәмілеге келмек?

АҚШ пен Иран арасындағы келіссөздер жаңа кезеңге өтіп, тараптар бірқатар маңызды мәселелер бойынша пікір алмасуды жалғастыруда. Кейбір бағыттарда ымыраға келу мүмкіндігі байқалғанымен, ядролық бағдарлама, Ормуз бұғазы және санкциялар мәселесі бойынша түйткілдер әлі шешілген жоқ.

Келіссөздер барысында тараптар бұқаралық ақпарат құралдарында тараған өзара түсіністік туралы меморандум жөніндегі ақпаратты жоққа шығарғанымен, АҚШ президенті Дональд Трамп пен Тегеран билігінің соңғы мәлімдемелері келіссөздердің жабық форматта жалғасып жатқанын көрсетті.

Мәліметтерге қарағанда, кейбір техникалық мәселелер бойынша ілгерілеу бар. Алайда негізгі саяси мәселелер бойынша ортақ келісімге қол жеткізілмеген.

Дональд Трамп Иранға қатысты бірнеше ұсыныс айтты. Оның бірі – Ормуз бұғазын азаматтық кеме қатынасы үшін толық ашу. АҚШ президентінің айтуынша, мұндай қадам жасалған жағдайда бұғаздағы шектеулер жеңілдетіліп, теңіз қатынасына байланысты мәселелер шешілуі мүмкін.

Сонымен қатар Вашингтон Иранның байытылған уран қорын жою және елдің ядролық бағдарламасын бақылау мәселесінде АҚШ пен Халықаралық атом энергиясы агенттігінің (МАГАТЭ) қатысуымен бірлескен жұмыс жүргізуді ұсынды.

Осы ұсыныстардан кейін Трамп Ақ үйдегі Ситуациялық орталықта ұлттық қауіпсіздік жөніндегі командасымен екі сағатқа жуық кеңес өткізді. АҚШ әкімшілігі президенттің Иранның ядролық қаруға ие болуына жол бермеу ұстанымын тағы да растағанын мәлімдеді.

Сарапшылардың пікірінше, қазіргі таңда үш негізгі мәселе бойынша келіспеушіліктер сақталып отыр. Олар – Иранның байытылған уран қоры мен ядролық қызметінің болашағы, шектеулерді жеңілдету бойынша алғашқы қадамды қай тарап жасайтыны және Иранға қарсы экономикалық санкцияларды алып тастау мерзімі мен шарттары.

Бақылаушылар Дональд Трамптың алдағы демалыс күндері Вашингтонда қалуын келіссөздерге қатысты жаңа байланыстар мен қосымша консультациялардың өту ықтималдығымен байланыстырып отыр.