Кендірлі әуежайының құрылысы 49 пайызға орындалды

Жаңа нысан өңірдің көлік инфрақұрылымын дамытуға және туристік әлеуетін арттыруға мүмкіндік береді. Бүгінде әуежай құрылысының жалпы орындалу деңгейі 49 пайызға жетті, – деп хабарлайды Aikyn.kz Маңғыстау облысы әкімінің баспасөз қызметіне сілтеме жасап.

Маңғыстау облысының әкімі Нұрдәулет Қилыбай нысанға барып, құрылыс барысымен танысты. Әуежайдағы ұшу-қону жолағының ұзындығы 2 200 метр, ені 35 метр болады. Нысан сағатына 150 жолаушыға дейін қызмет көрсетуге есептелген. Bombardier Q400, ATR-72, CRJ-200 және осыған ұқсас әуе кемелерін қабылдай алады. Әуежайды 2027 жылы пайдалануға беру жоспарланып отыр.
Қазіргі уақытта ұшу-қону жолағы, перрон, рульдеу жолы, периметрлік қоршау және кірме жол салынуда. Сонымен қатар жолаушылар терминалы, материалдық-техникалық қойма және авиациялық қауіпсіздік қызметінің ғимараты бой көтеруде.
Инженерлік инфрақұрылым бойынша байланыс, газ, су және электр желілері тартылуда. Бұдан бөлек әуе қозғалысын басқару пунктінің ғимаратын, аэронавигациялық және метеорологиялық жабдықтарды орналастыруға арналған нысандарды салу көзделген.
«Кендірлі» әуежайы – Маңғыстаудың туристік әлеуетін дамытуға бағытталған маңызды инфрақұрылымдық жобалардың бірі. Нысан пайдалануға берілгеннен кейін курорттық аймақтың көлік қолжетімділігі артып, жаңа ішкі және халықаралық әуе бағыттарын ашуға мүмкіндік туады.
Жоспарланып отырған ішкі бағыттар қатарында Атырау, Ақтөбе, Орал, Астана, Қызылорда және Алматы қалалары бар. Халықаралық бағыттар бойынша Нөкіс, Баку және Астрахань қалалары қарастырылуда.
Нысанның құрылыс барысымен танысқан облыс әкімі жобаның Мемлекет басшысы Қасым-Жомарт Тоқаев айқындаған өңірлердің көлік және туристік инфрақұрылымын дамыту міндеттері аясындағы маңызын атап өтті.

– Мемлекет басшысы өңірлердің инфрақұрылымын дамытуға, көлік қатынасының қолжетімділігін арттыруға және туристік әлеуетті тиімді пайдалануға ерекше мән беріп келеді. «Кендірлі» әуежайы – осы бағыттағы маңызды жобалардың бірі. Оның іске қосылуы курорттық аймақтың көлік қолжетімділігін арттырып, жаңа әуе бағыттарын ашуға мүмкіндік береді. Сондықтан құрылыс жұмыстарының сапалы орындалуын қамтамасыз етіп, жобаны белгіленген мерзімде аяқтау қажет, – деді Нұрдәулет Қилыбай.

Облыс әкімі жауапты мемлекеттік органдар мен мердігер ұйымдарға құрылыс барысын тұрақты бақылауда ұстауды, жұмыстардың сапасы мен қарқынын қамтамасыз етуді және туындаған мәселелерді жедел шешуді тапсырды. «Кендірлі» әуежайының іске қосылуы Маңғыстаудың туристік дамуына жаңа серпін беріп, курорттық аймақтың көлік қолжетімділігін арттыруға және өңірдің инвестициялық тартымдылығын күшейтуге мүмкіндік береді.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.