Кене шағудан қалай сақтану керек маман кеңесі

АСТАНА, 10 мамыр – Sputnik. Биыл көктем ерте шығып, күн бірден күрт жылынды. Табиғаттағы жәндіктер де ерте оянды. Соның бірі – кене. Биыл, әсіресе, оңтүстік аймақтарда кене көбейді.

Кенеден сақтану жолы қандай, ал шаққан жағдайда қандай шаралар қабылдау керек, бұл туралы Sputnik Қазақстанға Алматы облысы Қарасай аудандық санитариялық-эпидемиологиялық бақылау басқармасының басшысы Айгүл Сатыбекова айтып берді.

"Көктем мен жаз мезгілінде табиғат аясына шығушылар саны артып, сонымен қатар кене шағу қаупі де көбейеді. Кенелер – адам мен жануарлар арасында аса қауіпті жұқпалы ауруларды тарататын паразиттер. Сондықтан әрбір азамат кене арқылы берілетін аурулардың алдын алу жолдарын білуі маңызды. Өйткені кенелер арқылы адамға бірнеше жұқпалы ауру жұғуы мүмкін", - дейді Айгүл Сатыбекова.

Кене арқылы жұғатын қауіпті ауру

Кене арқылы неше түрлі ауру жұғуы мүмкін. Олардың ішінде ең қауіптілері:

Кене энцефалиті – орталық жүйке жүйесін зақымдайтын вирустық ауру;

Конго-Қырым геморрагиялық қызбасы – ауыр өтуімен және қан кету белгілерімен сипатталатын аса қауіпті инфекция;

Лайм боррелиозы – буын, жүйке жүйесі мен жүрекке әсер ететін бактериялық ауру;

Риккетсиоздар және басқа да табиғи-ошақты инфекциялар.

"Кенелер көбінесе шөп арасында, бұталы, ылғалды жерлерде, орман алқаптарында, жайылымдарда, өзен-көл маңында болады", - дейді саниатриялық-эпидемиологиялық бақылау басқармасының басшысы.

© PhotoАлматы облысы Қарасай аудандық санитариялық-эпидемиологиялық бақылау басқармасының басшысы Айгүл Сатыбекова

Алматы облысы Қарасай аудандық санитариялық-эпидемиологиялық бақылау басқармасының басшысы Айгүл Сатыбекова

© Photo

Кенеден қорғану жолдары

Табиғатқа шыққанда міндетті түрде дұрыс киініңіз. Өйткені кене шақпау үшін киімнің маңызы зор.

"Ашық түсті, ұзын жеңді киім киіңіз. Шалбардың балағын шұлықтың ішіне салыңыз. Сондай-ақ бас киім киіңіз. Негізінен денені мүмкіндігінше толық жабу керек", - дейді маман.

Айтпақшы, мейлінше ашық түсті киім кисеңіз, ашық түстен кенені тез байқауға болады.

Сондай-ақ репелленттерді пайдаланыңыз. Кенеге қарсы арнайы қорғаныш құралдарын, киімге, аяқ киімге, ашық дене бөліктеріне қолдану қажет. Алайда репеллентті пайдалану кезінде нұсқаулықты мұқият оқу маңызды.

"Табиғат аясында жүрген кезде әр 1-2 сағат сайын денеңізді жиі тексеріңіз. Киімді, денені, балаларды, үй жануарларын тексеріп отыру қажет", - дейді Айгүл Сатыбекова.

Кенелер көбіне мойынға, құлақ артына, қолтыққа, шап аймағына, тізе артына жабысады. Серуеннен кейін үйге келген соң міндетті түрде барлық киімді қағып, жуып, душ қабылдау керек.

"Кене денеге бірден қадалмай, бірнеше сағат бойы орын таңдайды. Сондықтан уақытылы тексеру өте маңызды", - дейді маман.

Кене шақса не істеу керек?

Егер кене шақса, ең бастысы – үрейленбеу керек. Кенені қолмен мыжуға, үстіне май құюға, күйдіруге болмайды. Бұл инфекция жұқтыру қаупін арттыруы мүмкін. Мүмкіндігінше жақын жердегі медициналық ұйымға жүгініп, кенені арнайы құралмен дұрыс алу керек.