Францияға саяхаттап барсаңыз қалта ұрыларынан қалай сақтану керек?

Францияда Рождество қарсаңында туристер көбейеді.

Алайда қонақтар қарасы қалыңдаған сайын, ұрылардың белсенділігі де арта түседі. Өйткені Париж әлі де Еуропадағы ең «қауіпті» қаланың бірі. Әйгілі шаһарға саяхаттап бара қалсаңыз «қалта ұрыларынан» қалай сақтану керек? 

Quotezone сақтандыру платформасының жаңа зерттеуі былтыр Францияны Еуропадағы қалта ұрлығы ең көп тіркелетін елдердің қатарына қосты. Мұны жергілікті Ішкі істер министрлігінің статистикасы да растайды. Өткен жылы елде  600 мыңнан аса ұрлық тіркелген. Ұрылардан саяхатшылармен бірге жеріглікті тұрғындар да жиі жапа шегеді. Парижде бірнеше жылдан бері тұратын Светлана жақында қалтасындағы смартфонын айырылып қалған.

Светлана Багдасарян, Париж қаласының тұрғыны:

- Автобусқа мінерде құлаққаппен музыка тыңдап тұрдым. Жолақы төлейтін картамды шығару үшін құлаққапты шешіп, ішке кірдім. Екі-ақ секунд өтпей телефонсыз қалдым. Ештеңе сезбедім, себебі автобусқа кіргенде адам бір бірін итеріп ондайды аңғармайсың. Мүмкін мені алдын ала бақылаған шығар деп ойлап қалдым.

Дегенмен көбіне қалта ұрыларының басты нысанасы - туристер. Былтыр Олимпиада кезеңінде Парижге 20 миллионнан астам шетелдік келген. Сиқырлы қаланың сұлулығына тамсанып, сақтықты ұмытып, опық жеп қалған саяхатшылар көп. Әсіресе, ұрылар оларды кезекте, метроды және көрікті жерлерде суретке түскенде торуылдайды. Екі жыл бұрын Еуротурға барған 24 KZ тілшісі Бақыт Топтаеваның жаңа сөмкесін біреулер дәл осылай үптеп кеткен.

Бақыт Топтаева, «24KZ» телеарнасының тілшісі:

- Дәмханада отырған кезде мен рюкзакты қасымдағы орындыққа қойдым, ал шағын сөмкемді өзім отырған орындықтың ыйығына іліп қойған едім. Қай сәтте ұрының оны алып кеткенін өзім де байқамай қалдым. Демалам, серуендеймін, әдемі сүретке түсем деген орнына полицияға барып, Эйфель мұнарасының жан-жағындағы қоқыс жәшіктерін аралаймын деп үш ұйықтасам да түсіме кірмепті. Дегенмен бұл жағдай жақсы шешілді.

Мұнараның маңын айнала сөмкесін іздеген отандасымыға жергілікті тұрғынның бірі көмектісіп, паспортын тауып берген. Бірақ мұндай мейірбан жандар ылғи жолыға бермейді. Былтыр Қазақстанның Франциядағы Консулдығына 94 азамат көмек сұрап жүгінген. Ал биыл жыл басынан 78 қазақстандыққа елге қайтуға арналған куәлік рәсімделген.

Марат Батырқұлов, Қазақстанның Франциядағы консулы:

- Францияға келген Қазақстан азаматы егер паспортын жоғалтса, ол бірден полиция комиссариатына барып, ол жерден анықтама алу керек. Одан кейін тікелей біздіқ Консулдыққа келіп, осы жерден арнайы Қазақстанға қайтып оралуға күәлік деген құжат бар, оны алады. Бұл құжат тек қана елге оралуға жарамды, басқа елдерге, ары қарай саяхатын жалғастыруға жарамайды.

Парижде ұрлық жиі жасалатын жер – қалалық метро. Жергілікті полиция ұрылардан сақтану үшін туристерден қарапайым қауіпсіздік ережелерін ұмытпауды сұрайды. Мысалы, көмкеңіздің қалталарын жауып, затыңызды қолыңызда ұстау. Ал вагонға кірген соң есікке жақын тұрмай ішке қарай өтуге кеңес береді. Бұл - ұрылардың қашу жолын қиындатады.

Кейінгі жылдары Парижде қалта тонайтындар арасында балалар мен қыз-келіншектер көбейген. Өйткені қылмыстық топтар жасөспірімдердің мұндай қылмыс үшін жауапкершілігі жеңіл болатынын пайдаланады. Осы себепті қазір елде жасырын патрульдер мен бейнебақылау күшейтілген. Десе де «сақтықта қорлық жоқ» дегенді естен шығармаған абзал.

Авторлары: Айдана Айтбекқызы, Руслан Өміржан