Киевке ядролық қару беру шабуыл ретінде бағаланады Федерация кеңесі

АСТАНА, 24 ақпан – Sputnik. Ұлыбритания мен Францияның Киевке ядролық қару жеткізуі олардың бірлескен шабуылы ретінде қарастырылады, деп мәлімдеді Ресей федерация кеңесі.

Бұған дейін Ресейдің сыртқы барлау қызметі Ұлыбритания мен Франция Украинаны атом бомбасымен қамтамасыз ету қажет деп санайтынын хабарлаған. Ведомствоға түскен ақпаратқа сәйкес, Лондон мен Париж Украинаны ядролық қарумен қаруландыруға дайындалып жатыр.

"Лондон мен Париждің Ресей Федерациясының Ядролық доктринасына сәйкес, ядролық емес мемлекеттің ядролық державаның қолдауымен агрессия танытуы олардың бірлескен шабуылы ретінде қарастырылатынын білмеуі мүмкін емес", — делінген Федерация кеңесінің баспасөз қызметі таратқан құжатта.

Сенаторлардың пікірінше, Ұлыбритания мен Франция басшыларының демократиялық институттарды айналып өтіп, Украинаға ядролық қару жеткізу туралы жауапсыз келісімі апатқа әкелуі мүмкін.

"Ұлыбритания мен Францияның Украинаға ядролық жарылғыш құрылғылар жеткізу ниетіне қатты алаңдап отырмыз. Мұндай жоспарларды жүзеге асыру қақтығыстың күрт ушығуына әкеліп, еліміздің қауіпсіздігіне, сондай-ақ бүкіл Еуропа өңіріне тікелей қатер төндіреді", — делінген үндеуде.

Сенаторлар Ұлыбританияның Қауымдар палатасы мен Лордтар палатасының мүшелерін, сондай-ақ Франция Ұлттық жиналысының депутаттары мен Сенат мүшелерін шұғыл түрде тиісті парламенттік тергеу бастауға және оның қорытындысы бойынша өз азаматтары мен халықаралық қауымдастықты осы аса қауіпті әрі ойланбай жасалған әрекеттің барлық мән-жайы туралы хабардар етуге шақырды.

Федерация кеңесі сондай-ақ БҰҰ Қауіпсіздік кеңесін, МАГАТЭ-ні және Ядролық қаруды таратпау туралы шартты сақтау жөніндегі конференцияны Ұлыбритания мен Франция билігінің ниетін тергеуге шақырды.

Үндеу дипломатиялық арналар арқылы Ұлыбритания мен Франция парламенттеріне, Еуропарламентке, сондай-ақ БҰҰ-ға, МАГАТЭ-ге және Ядролық қаруды таратпау туралы шарт тараптарын шолу конференциясының атына жолданды.