Кірпіштер жаңбыр сияқты жауды . Ұлдана Мырзуанның өліміне қатысты сотта жәбірленуші тыңдалды

Бүгін фельдшер Ұлдана Мырзуанның өліміне қатысты сотта жәбірленуші Гүлнар Қалиевадан жауап алынды. Ол сол бір қайғылы күннің егжей-тегжейін айтып берді, деп хабарлайды Tengrinews.kz тілшісі.

Жәбірленушінің айтуынша, 2025 жылғы 8 қарашада ол әпкесімен бірге үйінің жанындағы дүкенге бет алған. Олар ғимаратқа жақындай бергенде, үйдің қаптамасы кенеттен құлаған. Әйел тек басын қолымен жауып үлгерген.

"Бір қолыммен басымды жаптым, не болғанын бірден түсінбедім. Кірпіштер кеудемді қысып қалды. Ешқандай дыбыс шығара алмадым. Дүкеннен екі жігіт шығып, мені үйінді астынан шығарып алды. Сол кезде әпкемнің киімінің бір бөлігін көрдім. Ол да кірпіш астында қалыпты. Оның жағдайы өте ауыр еді, дауысы әрең шықты", - деді Гүлнар Қалиева сотта.

Әйелдің сөзінше, біраз уақыттан кейін жедел жәрдем бригадасы - құрамында Ұлдана Мырзуан бар екі фельдшер қыз келген. Дәрігерлер бірден жәбірленушінің әпкесіне қарай ұмтылған. Сол сәтте қасбет қайтадан опырылып түскен.

"Екі фельдшер қыз әпкеме жақындады. Көп ұзамай, бірден кірпіштер қайта құлай бастады. Кірпіштер жаңбырша жауды. Әпкем қайтыс болған шығар деп ойладым. Сол кезде фельдшер қыздардың бірі басын жауып, еңкейіп отыра қалды. Мен сол қыздың: "Онда Ұлдана қалды, кондер" дегенін естідім. Сосын Ұлдананы зембілге салып, алып кетті. Мен екінші фельдшермен бірге жедел жәрдем көлігімен кеттім", - деп бөлісті әйел.

Жәбірленуші ми шайқалуы, басынан алған жарақаты және көптеген дене жарақаттымен ауруханаға жатқызылды.

18 тамызда Астананың қылмыстық істер жөніндегі ауданаралық сотында басталды фельдшер Ұлдана Мырзуанның өліміне қатысты іс бойынша алдын ала тыңдау басталды. Істі судья Меруерт Абаева жүргізіп жатыр.

Бұған дейін марқұмның жұбайы Әділет Зейнел Ұлдананың анасының пайдасына жәбірленуші мәртебесінен бас тартатыны айтылған еді. Алайда кейін сот бұл өтінішті қанағаттандырудан бас тартты.

Айыпталушылар орындығында қайғылы оқиға болған үйдің МИБ төрағасы Сәуле Жұбаниязова отыр. Өткен сот отырысында ол өзін кінәсіз деп санайтынын мәлімдеді.

Ұлдананың анасының адвокаты Нұрсұлтан Орынбековтің айтуынша, бұл іс Қылмыстық кодекстің 254-бабы ("Міндеттерге адал қарамау") бойынша қаралып жатыр.

20 тамызда сотталушының адвокаты судья Меруерт Абаеваға қарсылық білдірді, алайда бұл өтініш қабылданбай, процесс жалғасты.

фельдшер Ұлдана Мырзуанның күйеуі Әділет Зейнел сотта жауап берді. Ер адам жұбайы қайғылы жағдайға ұшыраған күн туралы баяндады. Сондай-ақ ол сотқа жұбайының қазасы туралы қалай білгенін және әкімдікте алған 20 миллион теңге туралы хабарлады.

Сондай-ақ оның анасы да жауап берді. Әйелдің айтуынша, өз қызын танымай қалғанын ауруханаға барған кезде белгілі болған. Сонымен қатар жәбірленуші құдағиының әкімдіктен берілген көмек қаржының 4,5 миллион теңгесін қайтаруды талап еткенін жеткізді.

Бұған дейін Ұлдана Мырзуанның өліміне қатысты сот тікелей эфирде өтетіні хабарланды. Трансляцияны YouTube-арнамыздан және Tengrinews.kz сайтынан көруге болады.

2025 жылғы 8 қарашада Астанада Тәуелсіздік даңғылы, 24 Б мекенжайындағы тоғыз қабатты үйдің қасбетінен кірпіш қаптама құлаған. Салдарынан бес адам зардап шекті. Олар №1 көпбейінді ауруханаға жатқызылды.

Бір пациенттің жағдайы өте ауыр болды, оған ота жасалды. Тағы екі адам жансақтау бөлімінде жатты, дәрігерлер олардың жағдайын ауыр деп бағалады. Қалған екі адам бөлімшеге орналастырылды, олардың жағдайы тұрақты деп бағаланды.

Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Олардың арасында бала, оның анасы және туысы болған. Ұлдана зардап шеккендерге қарай жүгірген кезде, "үстіне кірпіш мен кондиционердің бекіткіші құлаған". 18 қарашада ол ауруханада көз жұмды.

Оқиғадан кейін полиция Қылмыстық кодекстің 278-бабы "Сапасыз құрылыс" бойынша қылмыстық іс қозғады. Кейін істе тағы бір бап пайда болды – 306-бап "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету".

Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы мына материалда.

Google News арқылы жаңалықтарымызды қадағалаңыз