Ұлдана Мырзуанның жұбайы жәбірленуші мәртебесінен бас тартады

Қаза тапқан фельдшер Ұлдана Мырзуанның күйеуі Әділет Зейнел жәбірленуші мәртебесінен бас тартады. Бұл туралы журналистерге оның адвокаты Мұрат Мауметов айтты, деп хабарлайды Tengrinews.kz тілшісі.

"Біз бас тарттық. Өтінішхат әлі ұсынылған жоқ, бірақ біз оны тапсырғалы жатырмыз. Әділет жәбірленуші мәртебесінен Ұлдананың анасының пайдасына бас тартады", - деді оның өкілі.

Сондай-ақ адвокат Әділеттің Ұлдана қаза тапқаннан кейін некеге тұру туралы шешімі оның жеке ісі және заңды құқығы екенін атап өтті.

Әділет Зейнелдің өзі журналистерге қандай да бір пікір білдіруден бас тартты.

Бүгін Астананың қылмыстық істер жөніндегі мамандандырылған ауданаралық сотында фельдшер Ұлдана Мырзуанның өліміне қатысты іс бойынша алдын ала тыңдау басталды. Істі судья Меруерт Абаева жүргізіп жатыр.

Процеске екі мемлекеттік айыптаушы Нұрдәулет Әбуов пен Саяжан Серікова, қаза тапқан фельдшер Ұлдана Мырзуанның анасы Сәлима Омарова және марқұмның күйеуі Әділет Зейнел қатысып жатыр. Оның адвокаты бұған дейін қаза тапқан Ұлдананың отбасы мен оның күйеуі арасындағы барлық қаржылық және мүліктік дау шешілгенін мәлімдеген болатын.

Еске сала кетейік, сотталушылар қатарында қайғылы оқиға болған үйдің МИБ төрағасы отыр. Ұлдананың анасының адвокаты Нұрсұлтан Орынбеков журналистерге хабарлағаны бойынша, іс Қылмыстық кодекстің 254-бабы "Міндеттерге адал қарамау" бойынша қаралып жатыр.

Ұлдана Мырзуанның өліміне қатысты сот процесі тікелей эфирде өтетіні белгілі болды.

2025 жылғы 8 қарашада Астанада Тәуелсіздік даңғылы, 24 Б мекенжайындағы тоғыз қабатты үйдің қасбетінен кірпіш қаптамасы құлаған. Салдарынан бес адам зардап шекті. Олар №1 көпбейінді ауруханаға жатқызылды.

Бір пациенттің жағдайы өте ауыр болды, оған ота жасалды. Тағы екі адам жансақтау бөлімінде жатты, дәрігерлер олардың жағдайын ауыр деп бағалады. Қалған екі адам бөлімшеге орналастырылды, олардың жағдайы тұрақты деп бағаланды.

Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Олардың арасында бала, оның анасы және туысы болған. Ұлдана зардап шеккендерге қарай жүгірген кезде, "үстіне кірпіш мен кондиционердің бекіткіші құлаған". 18 қарашада ол ауруханада көз жұмды.

Оқиғадан кейін полиция Қылмыстық кодекстің 278-бабы "Сапасыз құрылыс" бойынша қылмыстық іс қозғады. Кейін істе тағы бір бап пайда болды – 306-бап "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету".

Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы мына материалда.

Google News арқылы жаңалықтарымызды қадағалаңыз