Фельдшер Ұлдана Мырзуанның жұбайы жаңа некесіне қатысты сыннан кейін алғаш рет үнсіздігін бұзды

Қаза тапқан фельдшер Ұлдана Мырзуанның жесірі Әділет Зейнел алғаш рет кейінгі айлардағы оқиғаларға қатысты егжей-тегжейлі пікір білдіріп, қоғамда қызу талқыланған сұрақтарға жауап берді. Ол өзінің жаңа келіншегімен түскен суреттері жарияланғаннан кейін басталған сын толқынынан соң анасымен бірге сұхбат берді, деп хабарлайды Tengri Life.

Әңгіме барысында Зейнел жаңа қарым-қатынасы туралы айтып, Ұлдананың өліміне қатысты қылмыстық іс бойынша ұстанымын түсіндірді, трагедиядан кейін жиналған ақшаға, көлік пен мұраға қатысты жағдайға түсініктеме берді, сондай-ақ әлеуметтік желі қолданушыларының айыптауларына жауап берді.

Жаңа неке және жұбайымен таныстығы туралы

Сұхбаттың негізгі тақырыптарының бірі Әділеттің жаңа қарым-қатынасы болды. Оның айтуынша, қазіргі жарымен ол тек осы жылдың көктемінде танысқан.

"Біз сәуірдің аяғынан, мамыр айынан бастап араласа бастадық деуге болады. Ол да жедел жәрдемде жұмыс істеген, бірақ қазір көбі жазып жатқандай, Ұлдананың құрбысы болған жоқ. Екі жыл ішінде олар тек бір-ақ рет бір ауысымға шыққан. Олар тек әріптес ретінде таныс болды", - деді ол.

Әділет трагедиядан кейін қалыпты өмірге біртіндеп оралуына дәл осы жаңа қарым-қатынасы көмектескенін айтты.

"Қазіргі күліп, бақытты болып жүргенім - анамның, Алланың және соның арқасы. Ол бойымдағы өмірге деген құлшынысты қайта оятты. Мен онымен бірге жаңа мақсаттарға жеткім келеді", - деп атап өтті ол.

Сонымен қатар ол әлеуметтік желілерде жұбайының жүктілігі туралы тарап жатқан ақпаратқа да түсініктеме берді, бірақ оны тікелей растаудан немесе жоққа шығарудан бас тартты.

"Солай-ақ болсын. Біз білмейміз. Бұл - жеке өмір. Бірақ егер ол жүкті болса, мен тек қуанамын. Мен үшін бұл өмірдің жаңа кезеңі болады", - деді марқұмның жұбайы.

Неге қалыңдықпен түскен суреттер дау тудырды?

Әділеттің айтуынша, олар отбасылық шарадан түсірілген суреттердің жариялануы талқылау тудыруы мүмкін екенін түсінген, бірақ мұндай ауқымды сын болады деп күтпеген.

Ол қарым-қатынасын жария етуді жоспарламағанын, ал суреттер интернетке олардың келісімінсіз шығып кеткенін алға тартады.

"Бұл суреттер туралы үйге бара жатқанда бірақ білдік. Мейрамхана иелері мен мобилографтар оны өз мекемелерін жарнамалау үшін жариялап жіберген. Біз оларға ешқандай рұқсат берген жоқпыз", - деді ол.

Әділеттің анасы отбасының ешкімнің көңіліне тигісі келмегенін және бұл оқиғаны жариялауды жоспарламағанын айтты.

Неге отбасы Ұлдананың анасына хабарласпаған?

Әділеттің анасы жаңа неке алдында Ұлдананың анасынан бата сұрамау себебін түсіндірді: олар қызынан айырылған ана үшін мұндай жаңалық қосымша соққы болады деп санаған.

Ол бұған дейін Ұлдананың әжесі жағынан туыстары Әділеттің жаңадан отау құруына қарсы болмайтындарын айтқанын жеткізді.

"Мен оның жарасын қайта тырнағым келмеді. Барлығын тыныш қана өткізуді жөн көрдік", - деді ол.

Алайда суреттер жарияланғаннан кейін ақпарат әлеуметтік желілерде тез тарап кеткен.

Жәбірленуші мәртебесі туралы

Сұхбат барысында Әділет қылмыстық іс бойынша жәбірленуші мәртебесінен бас тарту ниеті жоқ екенін растады.

"Мен бұл істі бастадым және оны соңына дейін жеткізгім келеді. Әділдік орнағанын қалаймын. Егер қазір бас тартсам, "жаңа отбасын құрды да, бәрін ұмытты" дейді. Бірақ мәселе онда емес. Менің Ұлдананың алдындағы борышым бар", - деді ол.

Сондай-ақ ол қаза тапқан жарының туыстарымен қазір байланысы жоқ екенін айтты.

"Ақпан айынан бері ашығын айтқанда араласпаймыз. Олармен ұрысқым келмейді. Бұрын арамызда сыйластық бар еді", - деп атап өтті Әділет.

Трагедиядан кейін жиналған ақша туралы

Сұхбаттың жеке блогы әлеуметтік желілерде талқыланып жатқан, Ұлдананың қазасынан кейін жиналған 20 миллион теңгеге арналды.

Әділеттің анасы бұл ақша өтемақы емес, адамдардың жерлеу рәсіміне жинаған қаражаты екенін мәлімдеді.

Оның айтуынша, шамамен 10 миллион теңге Ұлдананың кепілде тұрған көлігінің несиесін жабуға жұмсалған, қаражаттың тағы бір бөлігі марқұмның анасы мен әпкесіне аударылған, сондай-ақ жерлеу және еске алу шараларына жұмсалған шығындар төленген.

"Біздің отбасымыздың жеке қажеттіліктеріне бір тиын да жұмсалған жоқ. Барлық түбіртектер жанымда", - деп қосты ол.

Әділеттің өзі де отбасының қандай да бір мемлекеттік өтемақы алғаны немесе пәтер талап еткені туралы қауесеттерді жоққа шығарды.

"Біз ешқандай өтемақы алған жоқпыз және талап етпедік. Менің өз пәтерім бар. Ешкімнен ештеңе сұраған емеспіз", - деді ол.

Ұлдананың туыстарымен болған келіспеушілік

Әділет пен анасының айтуынша, екі отбасы арасындағы қарым-қатынас қайғылы оқиғадан бірнеше ай өткен соң нашарлай бастаған.

Олар мұны Әділеттің жаңа жеке өмірі туралы ақпараттың пайда болуымен байланыстырады.

Ер адамның анасы Ұлдананың туыстарына болып жатқан жағдайды қабылдау қиын болды деп есептейді.

"Меніңше, олар оны опасыздық жасады деп ойлады. Бірақ адам алға қарай ұмтылып, өмір сүруі керек қой", - деді ол.

Әділеттің өзі жаңа отбасын құруды опасыздық деп санамайтынын қадап айтты.

"Мен өзімді опасыз санамаймын. Егер жаңа өмір бастау опасыздық болса, солай-ақ ойлай берсін. Бірақ мен үшін бұл дені сау адамның қалыпты талпынысы", - деп толықтырды ол.

Сонымен қатар ол Ұлдананың туыстарына ешқандай кек сақтамайтынын атап өтті.

"Олар туралы жаман сөйлегім келмейді. Барлығында бәрі жақсы болсын", - деді жесір қалған ер адам.

Желідегі сын туралы

Әділет жағымсыз хабарламалардың көптігіне байланысты өзінің Instagram-дағы бұрынғы аккаунтын ақпан айында-ақ өшіріп тастағанын айтты.

Оның сөзінше, қазір өзіне де, қазіргі жарына да қоқан-лоқылар мен балағат сөздер жазылып жатыр. Айтуынша, келіншегі болып жатқан жағдайды өте ауыр қабылдап, "күн сайын жылайды".

Әділеттің анасы балаларының ар-намысы мен қадір-қасиетіне нұқсан келтіретін жарияланымдар мен пікірлер үшін сотқа жүгінуге ниетті екенін хабарлады.

"Біз бұл істі бастап кеттік. Ешкімнің шектен шығуға құқығы жоқ", - деді ол.

Ұлдананы еске алу

Жаңа некеге қарамастан, Әділет қаза тапқан жары туралы естеліктің өмірінің маңызды бөлігі болып қала беретінін мәлімдеді.

"Мен оны сүйдім және сүйемін. Біз оны еске алып тұрамыз. Бұл оны ұмыттым дегенді білдірмейді. Тек ары қарай өмір сүруге тырысып жүрмін", - деп бөлісті ол.

Ол Ұлдананың қайтыс болғанына бір жыл толуына орай отбасы асында еске алу рәсімін өткізіп, құран бағыштауды жоспарлап отырғанын айтты.

Қазіргі уақытта Зейнел дәрігер-анестезиолог-реаниматологтың ассистенті болып жұмыс істейтінін және емделушілерге кеңес беретінін жеткізді.

Оқиғаның мән-жайы

Еске сала кетейік, бұған дейін желіде қаза тапқан фельдшер Ұлдана Мырзуанның анасы Сәлима Ешанқұлованың мәлімдемесі тараған болатын. Ол қызының бұрынғы күйеуі Әділет Зейнелдің қайғылы жағдайдан сегіз ай өткеннен кейін қайтадан шаңырақ көтергені туралы әлеуметтік желідегі ақпаратқа қатысты пікір білдірген еді.

Сәлима Ешанқұлованың сөзінше, отбасына алдағы той туралы алдын ала ескертілмеген, ал бұрынғы күйеу баласы мен оның туыстары қайғылы оқиғадан кейін Ұлдананың жақындарымен байланысын үзген.

Бейнежазбамен бірге жарияланған хабарламада фельдшердің қазасына қатысты қылмыстық іс аяқталу сатысында екені, ал отбасы өкілдері тергеу материалдарымен танысып жатқаны атап өтілген.

Сәлима Ешанқұлова Ұлдананың өлімінен кейін оның мүлкінің қалай бөлінгеніне де тоқталып өтті. Оның айтуынша, қызының 17 жасынан бастап жинаған зейнетақы жинақтары қолданыстағы заңнамаға сәйкес күйеуіне берілген. Ал автокөлік марқұмның ата-анасына өтуі тиіс болған.

Бұл ретте, әйелдің айтуынша, шын мәнінде көлік Ұлдана қайтыс болғаннан кейін сегіз айдан астам уақыт бойы Әділет Зейнелде болған және тек 2026 жылдың 22 шілдесінде ғана ата-анасына қайта рәсімделген.

Әйелдің айтуынша, отбасы марқұмның мүліктік құқықтарын қорғауға және тергеуге байланысты бірқатар заңдық мәселелерді қайта қарау үшін құзырлы органдарға жүгінуге ниетті. Сондай-ақ ол Әділет Зейнелдің қылмыстық істе жәбірленуші ретінде танылғанын, бірақ отбасы бұл шешімді қайта қаратуды көздеп отырғанын мәлімдеді.

Instagram-дағы бұл жарияланымды көру

TengriNews | Қазақстан жаңалықтары (@tengrinewskz) жарияланымы

Жас фельдшердің өмірін қиған қасірет

Еске сала кетейік, 2025 жылы 8 қарашада Астанада Тәуелсіздік даңғылындағы тоғыз қабатты тұрғын үйдің қасбетінен кірпіш қаптамасы мен кондиционер бекіткіші құлаған болатын. Оқиға салдарынан бес адам зардап шекті.

23 жастағы жедел жәрдем фельдшері Ұлдана Мырзуан бригада құрамында оқиға орнына келген. Туыстарының айтуынша, бойжеткен алғашқылардың бірі болып зардап шеккендерге көмекке ұмтылған, олардың арасында бала, оның анасы және туысы болған. Дәл осы сәтте оның үстіне кірпіш қаптамасы мен кондиционер бекіткіші құлаған.

Ауыр жарақат алған Ұлдана ауруханаға жатқызылды. Ол он күн бойы жансақтау бөлімінде өте ауыр халде жатты, алайда 2025 жылдың 18 қарашасында көз жұмды.

Оқиғадан кейін полиция Қылмыстық кодекстің 278-бабы ("Сапасыз құрылыс") бойынша қылмыстық іс қозғады. Кейінірек тергеу ҚК-нің 306-бабы ("Қауіпсіздік талаптарына сай келмейтін тауарларды шығару немесе сату, жұмыстарды орындау немесе қызмет көрсету") бойынша да жүргізіле бастады.

Қоғамдық резонанс

Ұлдана Мырзуан мен дәрігер-реабилитолог Әділет Зейнел 2025 жылы 30 қыркүйекте - қайғылы оқиғаға дейін бір жарым айдан аз уақыт бұрын үйленген болатын.

Жұбайы қайтыс болғаннан кейін Әділет Зейнел әлеуметтік желілерде қоштасу хатын жариялап, онда қарым-қатынасы туралы айтып, Ұлдананы өзінің үлкен махаббаты деп атаған еді.

Жақында әлеуметтік желілерде Таразда өтті делінген ұзату тойының кадрлары тарады.

Фото: TikTok/@stan.kz

Ұлдана қайтыс болғаннан кейін сегіз ай өткен соң Әділет Зейнелдің қайтадан үйленгені туралы хабарланды. Сәлима Ешанқұлованың түсіндіруінше, дәл осы ақпарат шыққаннан кейін отбасы қазақстандықтар мен БАҚ өкілдерінен түскен көптеген сұраққа ашық жауап беруді ұйғарған.

Тағы оқыңыз: Қосшыда қазақстандықтар фельдшер Ұлдана Мырзуанды ақтық сапарға шығарып салды

Google News арқылы жаңалықтарымызды қадағалаңыз

Жазылу