Кітапхана саласы да заман көшінен қалған жоқ Нұржан Жолдыбалинов

Ол әңгіме барысында Ұлттық академиялық кітапханада еңбек еткеніне 20 жылға жуықтағанын атап өтті.

– Мен осы кітапханаға 20 жасымда келгенмін. Содан бері зу етіп 20 жыл өте шықты. Әрине, бірден бастық болып келген жоқпын. Ең бірінші келгенде 2007 жылғы Ақпараттық кеңістікті тереңдету бағдарламасы аясында электрондық кітапхана құрылған. Сол жерде кітаптарды сандық нұсқаға түсіруден бастағанмын, - дейді Нұржан Жолдыбалинов.

Кітапхана саласының маманы технология түрленіп, заман уақыт сайын өзгерген тұста, кітапханашылардың қызметі де қарыштап дамып келе жатқанын айтады.

– Кітапхана саласы да заман көшінен қалған жоқ. Жасанды интеллектіні белсенді түрде қолданып жатырмыз. Әр кітапхананың ішінде АІдос деп аталатын ассистент жасап жатырмыз. Тестілеу режимінен өтті. Кітапханаға келген оқырман виртуалды кітапханашымен сөйлесіп тұрғандай өзінің тақырыбын айтады. Қандай мақсатпен келгенін бізде ол құжаттар болса, бірден оқырманға ұсына береді, - дейді ол.

Нұржан Жолдыбалиновтың сөзінше, қазір кітапханашы болғысы келетін жастардың қатары көбейген. Ол тәжірибе алу үшін келетін студенттер бірден кітапханада қалғысы келетінін айтады. 

– Орта білімді бітіріп, кітапхана саласына түсейін дегенмін деп келетін оқушылар өте көп. Көбінде қай жақтан білім алуға болатынын сұрап келеді. Біз ақыл-кеңесімізді айтып, бағыт көрсетеміз. Келушілер арасында қаз балалармен қатар, жігіттер де бар. Бірақ, барлығы жалақыға келіп тіреледі. Бұл енді уақыттың еншісіндегі шаруа, - дейді кітапханашы.

Бүгінде республика бойынша 236 архив мекемесі жұмыс істейді. Ұлттық архив қорында 74,5 мың қорды қамтитын 27 миллионнан астам сақтау бірлігі бар. Білікті мамандар даярлау мақсатында «Кітапхана ісі, ақпаратты өңдеу және архив ісі» бағыты бойынша мемлекеттік білім беру тапсырысы екі есе өсті — бакалавриат бойынша грант саны 20-дан 100-ге дейін көбейді.

2025 жылы елімізде жалпы қолжетімді кітапханалар желісі 3 883 кітапханаға жетті, олардың кітап қоры — 72 283 946 дана. Республика бойынша кітапханаларға оқырмандардың келу саны — 51 млн адам.