Көлік министрлігі демалыс кезеңінде қазақстандықтарға ескерту жасады

Демалыс маусымы қызған шақта Көлік министрлігі қазақстандықтарды жолдарда барынша сақ болуға шақырды. Ведомство жаз мезгілінде тасжолдардағы көлік легі дәстүрлі түрде артатынын еске салды, деп хабарлайды Tengri Auto.

Министрлік жаз мезгілінде республикалық тасжолдарда, әсіресе өңірлер арасындағы және демалыс орындарына баратын бағыттарда көлік легі айтарлықтай артатынын атап өтті. Осыған байланысты жүргізушілерге жылдамдық режимін сақтау, басып озу ережелерін бұзбау, шаршаған күйде рөлге отырмау және тәуліктің қараңғы уақытында, сондай-ақ жолдың аса қарбалас учаскелерінде барынша сақ болу ұсынылады.

Егер көлікте балалар болса, қауіпсіздік белдіктерін және балаларды ұстайтын құрылғыларды пайдалану қажет. Көлік министрлігі жол-көлік оқиғаларының басым бөлігі жол қозғалысы ережелерін бұзу салдарынан болатынын еске салды.

Ведомство мәліметінше, барлық жол апаттарының 91 пайызы осы себептен болады. Көбіне жылдамдықты асыру басты себепке айналады. Екінші орында - көлікті басқара алмай қалу, одан кейін қашықтықты сақтамау және жол белгілеріне мән бермеу тұр.

Бұл ретте республикалық тасжолдарда апаттар саны азайған. 2026 жылдың бірінші жартыжылдығында жол-көлік оқиғаларының саны 1 507-ден 1 371 жағдайға дейін, яғни 9 пайызға төмендеді. Бұл жолдардағы қозғалыс қарқындылығының айтарлықтай артуына қарамастан тіркеліп отыр. Алты ай ішінде тасжолдармен 22,3 миллион автокөлік жүріп өткен, бұл өткен жылмен салыстырғанда 37 пайызға артық.

Министрлік апаттылықтың төмендеуінің бір себебі ретінде орташа жылдамдықты бақылау жүйесін атайды. Қазіргі уақытта бұл жүйе жалпы ұзындығы 2,3 мың шақырым болатын ақылы жолдарда жұмыс істейді.

Ведомство мәліметінше, бұл жүйе енгізілгеннен кейін аталған учаскелердегі жол-көлік оқиғаларының саны 17 пайызға қысқарды.

"ҚР КМ Автомобиль жолдары комитеті жол қозғалысының барлық қатысушысын Жол қозғалысы ережелерін сақтауға шақырады. Жолдағы қауіпсіздік әрбір жүргізушінің жауапкершілігіне байланысты екенін ұмытпаңыздар", - деп атап өтті ведомство.

Бұған дейін қазақстандық жүргізушілер арасында ең танымал бағыт болып Алматы – Қонаев тасжолы қала беретінін жазған болатынбыз. Жыл басынан бері бұл учаскеде 4,3 миллионнан астам көлік жүрісі тіркелген.

Танымалдылығы бойынша одан кейінгі орындарда:

Шымкент - Өзбекстан шекарасы - 3,7 миллион; Шымкент - Тараз - 2,5 миллион; Тараз - Қайнар - 2,1 миллион; Шымкент - Қызылорда - 1,8 миллион; Қонаев - Талдықорған - 1,4 миллион; Астана – Теміртау – 1,4 миллион; Астана – Щучинск – 1,3 миллион; Тараз қаласын айналып өту жолы - 1,03 миллион; Алматы - Қорғас - 1,005 миллион.

Тағы оқыңыз: Қазақстанның қай жерінде рөлге отыру қауіптірек: жол апаттарының жаңа статистикасы

Google News арқылы жаңалықтарымызды қадағалаңыз

Жазылу