“Көр де байы“ Қызылордада пирамида ұйымдастырушысы сотталды

Қызылордада "WornerBros" қаржы пирамидасының құрылымдық бөлімшесін басқарған адамға қатысты үкім шықты. Толық мәліметті Қаржылық мониторинг агенттігінің баспасөз қызметі мәлім етті, - деп хабарлайды Tengrinews.kz.

Қызылордада "WornerBros" қаржы пирамидасының құрылымдық бөлімшесін басқарған адамға қатысты үкім шықты. Толық мәліметті Қаржылық мониторинг агенттігінің баспасөз қызметі мәлім етті, - деп хабарлайды Tengrinews.kz.

Мәліметтерге сәйкес, ұйымдастырушы азаматтарды WornerBros платформасы арқылы қысқа бейнероликтер мен фильмдер көргені үшін табыс табуға уәде беріп, қаржы пирамидасына тартқан.

Қатысушыларға рефералдық сілтеме арқылы платформаға тіркеліп, құны 10 мыңнан 11 миллион теңгеге дейінгі VIP-пакеттердің бірін сатып алу ұсынылған. Ол үшін күніне 735 мың теңгеге дейін пайда табуға уәде берілген.

"Әрбір жаңа қатысушы үшін бонус төленіп отырған, бұл азаматтарды жүйеге тұрақты түрде тартуға ынталандырған. Схеманы насихаттау үшін WhatsApp топтары, әлеуметтік желілердегі жарнамалар және үгіт-насихат кездесулері пайдаланылған", - деп хабарлады ведомство.

Тергеу барысында салымшылардың ақшасын жинақтау және транзиттеу үшін пайдаланылған криптоәмияндар анықталды.

"Сот санкциясы бойынша, 3 миллион USDT сомасындағы криптоактивтерге тыйым салынды. Сот сотталушыны кінәлі деп танып, оған 5 жылға бас бостандығынан айыру жазасын кесті. Сондай-ақ 24 жәбірленушінің азаматтық талап арыздары қанағаттандырылды", - деп мәлімдеді ҚМА өкілдері.

Үкім заңды күшіне енгені нақтыланады.

Еске салайық, 2024 жылдың күзінде Алматыда Warner Bros деп аталатын қаржы пирамидасының ұйымдастырушысына үкім шыққан болатын. Сот үкімімен оған 5 жылға бас бостандығынан айыру жазасы тағайындалды.