Күйеулерінен ажырасып, ішімдік ішетін құрбыларымен араласуға тыйым салдым Марқұм Айзат Жұманованың күйеуі

Талдықорған қаласында өтіп жатқан сот процесінде әйелі Айзат Жұманованы өлтірді деген айып тағылған Айбар Жанболаттан жауап алынды. Сотталушы әйеліне қол көтергенін мойындап, жасаған ісі үшін жаза тартуға дайын екенін айтты, деп Arasha.kz тілшісі kznews.kz сайтына сілтеме жасап хабарлайды.

Айыпталушының айтуынша, қайғылы оқиға қызғаныштан туындаған жанжалдың салдары. Ол сол күні 5-6 бөтелке сыра ішіп, үйіне мас күйде келгенін, содан кейін ерлі-зайыптылар арасында ұрыс шығып, арты төбелеске ұласқанын жеткізді.

Өзінен физикалық тұрғыда әлсіз болған әйеліне ер адам үй ауласында жұдырықпен кеуде тұсынан соққы жасап, бірнеше рет алақанымен ұрған. Оның сөзінше, әйелін үйге кіргізіп бара жатқан сәтте екеуі табалдырықтан сүрініп, бірге құлап қалған.

"Үйде мен оны ваннаға апардым, ол өзі жуынып, өзін ретке келтірді. Кейін жағдайы қатты нашарлап кетті, мен оған ашық түсті трико кигізіп, ауруханаға апаруды ұйғардым. Жедел жәрдемнің келуі көп уақыт алатын болғандықтан көрші Нұрсұлтаннан көмек сұрадым. Баласаз ауылымыз тауда орналасқан, аудан орталығынан бізге жету бір сағаттан да көп уақыт алады", – деді айыпталушы сотта.

Айыпталушының айтуынша, көршісімен бірге Айзат Жұманованы алдымен Суықсай ауылына жеткізіп, ата-анасынан жол талғамайтын көлік алып, кейін аудан орталығы – Жансүгіров ауылына барған. Алайда аудандық аурухана жөндеу жұмыстарына жабық болғандықтан, әйелді Талдықорған қаласындағы ауруханалардың біріне апарған. Қала арақашықтығы шамамен 100 шақырым.

Айбар Жанболат сотта әйелін қасақана өлтіру ниеті болмағанын, барлығы қызғаныштан туған жағдай екенін айтты.

"Бұрын да арамызда кикілжің болған, бірақ қол көтеруге дейін барған емес. Мен оған күйеулерінен ажырасып, ішімдік ішетін құрбыларымен араласуға тыйым салдым. Олардың ықпалы маған ұнамайтын, мұны талай айттым. Мен оны жақсы көрдім, бірақ бұл жолы өзімді ұстай алмадым", – деді сотталушы.

Прокурор мен жәбірленуші тараптың сұрақтарына жауап берген сотталушы қасақана адам өлтіру ниеті болмағанын тағы да қайталады.

"Мен оны ұрғанымды мойындаймын және жаза тартуға дайынмын. Ал оны далада атқа байлап сүйреді немесе көлікпен сүйреді дегендердің бәрі өтірік", – деді ол.