Лайық емес пе? Билет құнына байланысты қазақстандықтарға ұшақта фильм көруге рұқсат берілмеді

FlyArystan жолаушысы ұшақтың ауыстырылғанына шағымданды: лоукостер бортының орнына рейсті Air Astana ұшағы орындаған, алайда бұл әуекомпания жолаушыларына үйреншікті планшеттер мен құлаққаптар берілмеген. FlyArystan мұндай ауыс-түйіс кезінде қызмет көрсету жиынтығы неге өзгермейтінін түсіндірді, деп хабарлайды Tengri Travel.

Бәрі қалай басталды?

Жолаушы бұл оқиға туралы әлеуметтік желілерде бөлісті. Оның айтуынша, FlyArystan рейсі Air Astana ұшағымен орындалған. Алайда жолаушыларға құлаққап берілмеген, ал мультимедиялық жүйе қолжетімсіз болған. Дәм ретінде тек су мен печенье ұсынылған.

"Кеше FlyArystan рейсімен ұштым, бірақ бортты Air Astana ұсынды. Ең қызығы: бізге фильм көру үшін құлаққап бермеді, ал планшеттерді ұша бастағанда-ақ өшіріп тастады. Су мен печенье бергеніне рақмет. Бұл әрдайым осылай ма? Егер тасымалдаушы қымбат болып шықса, біз құлаққапқа лайықты емеспіз бе?" - деп бөлісті жолаушы.

Скриншот: Threads

Пікір қалдырушылар арасында басқа желі қолданушылары да ұқсас жағдайлар туралы айтып берді.

"Ал бізге Air Astana-ны FlyArystan-ға ауыстырған кезде, дұрыс тамақтың орнына бір бәліш пен су берді, әрине, ол жерде ешқандай планшет пен құлаққап жоқ", "Бәрі оңай: бейнематериалдарды жеткізушімен жасалған келісімшартқа сәйкес, видеоны тек Air Astana рейстерінде көрсетуге болады, өйткені FlyArystan - басқа заңды тұлға", "Иә, өйткені сіз қызмет деңгейін көтеру үшін ақы төлеген жоқсыз. Біз де бірде осылай ұшқанбыз", - деп бөлісті пікір қалдырушылар.

Әуекомпания не дейді?

Біз түсініктеме алу үшін FlyArystan баспасөз қызметіне жүгіндік. әуекомпания ұшақтарды жедел себептерге байланысты ауыстыруға тура келетінін түсіндірді. Олардың қатарында техникалық іркілістер, борттың кешігіп келуі және рейстің орындалуына әсер етуі мүмкін басқа да жағдайлар бар.

"Әуе кемелерін ауыстыру операциялық қажеттілікке, соның ішінде техникалық іркілістерге, әуе кемесінің кешігіп келуіне және рейстің уақтылы орындалуына әсер ететін басқа да жағдайларға байланысты", - деп атап өтті компания.

Бұл ретте ұшақтың ауыстырылу фактісі қызмет көрсету класының автоматты түрде көтерілуін білдірмейді.

Компанияның баспасөз қызметі егер FlyArystan рейсі Air Astana әуе кемесімен орындалса, жолаушы өзінің бастапқы билетінде қарастырылған қызметтерді алатынын хабарлады.

"FlyArystan рейсі Air Astana әуе кемесінде орындалған кезде жолаушының бастапқы билетінде қарастырылған шарттар толық көлемде сақталады. Планшеттер, құлаққаптар және мультимедиялық жүйеге қолжетімділік лоукостердің стандартты қызметтер тізіміне кірмейді және әуе кемесі жедел ауыстырылған кезде оларды ұсыну техникалық тұрғыдан мүмкін емес", - деп түсіндірді әуекомпания.

Егер бортыңыз ауыстырылса не істеу керек?

Бұған дейін Көлік министрлігі осындай жағдайға тап болған жолаушылардың қайда шағымдануы керектігін айтқан болатын.

"Отандық әуе тасымалдаушыларының жұмысына қатысты мәселелер бойынша қазақстандықтар e-Otinish порталы арқылы Азаматтық авиация комитетіне, Қазақстанның авиациялық әкімшілігіне, сондай-ақ Тұтынушылардың құқықтарын қорғау комитетіне өтініш жолдай алады", - деп түсіндірді ведомство.

Тәжірибелі саяхатшылар рейс ауыстырылған кезде дәлелдемелер жинауға кеңес береді: хабарламалардың скриншоттарын жасау, отырғызу талондарын, сатып алу шарттарын және қолдау қызметімен хат алмасуды сақтау - мұның бәрі әуекомпанияға ресми шағым түсіру кезінде қажет болады.

Егер тасымалдаушы жауап бермесе, бақылаушы органдарға жүгіну қажет.

Жайсыз жағдайлардан қалай сақтануға болады? Ұшуға бір-екі тәулік қалғанда рейс мәртебесін және отырғызу талонындағы деректерді тексеріңіз. Чектерді, билеттерді және қызмет көрсету класы мен құнын растайтын кез келген құжаттарды сақтаңыз. Ұшақ ауысқан кезде әуекомпания өкілінен түсініктеме талап етіңіз және жүгіну фактісін тіркеңіз. Егер құқығыңыз бұзылса, тасымалдаушының сайты арқылы ресми шағым жолдаңыз.

Бізді Google-дың негізгі дереккөздер тізіміне қосыңыз

Қосу