Лондондағы қазақстандықтар таңғы уақыттан бері референдумда дауыс беріп жатыр

Бүгін, Лондон уақытымен таңғы сағат 7:00-де (Астана уақытымен 12:00) Қазақстанның Ұлыбритания мен Солтүстік Ирландияның Біріккен Корольдігіндегі елшілігінде референдумның № 408 сайлау учаскесі ашылды.

Мұнда Ұлыбритания, Солтүстік Ирландия, Ирландия Республикасы және Исландияда тұратын немесе уақытша жүрген дауыс беруге құқығы бар Қазақстанның ересек азаматтары дауыс бере алады.

Дауыс берушілер әртүрлі санда келіп жүр: кейбіреулері дауыс беруге жалғыз келсе, басқалары отбасы мүшелерімен бірге қатысып отыр. Келгендердің арасында британдық университеттерде білім алып жүрген көптеген жастар бар. Сондай-ақ дауыс беруге қатысу үшін басқа қалалардан арнайы келгендер де бар.

Дауыс беруге бірінші болып Лондон университеті колледжінің химиялық инженерия факультетінің докторанты Руслан Шаяхынұлы келді.

- Бұл біздің еліміз үшін оның болашақ даму бағытын анықтайтын жауапты қадам. Менің ойымша, республиканың әрбір азаматы дауыс беріп, сол арқылы ел тағдырына атсалысу керек, - деді ол.

Руслан Шаяхынұлы Лондонда төрт жыл бойы оқып жүр және сайлауға үнемі қатысып келеді. Ол үшін бұл тек азаматтық ұстанымын білдіру мүмкіндігі ғана емес, сонымен қатар отандастарымен кездесу, араласу және жаңалықтар алмасу мүмкіндігі.

Елшілікте қонақтар үшін ұлттық тағамдар қойылған шағын үстел жайылды. Қонақтарды дәстүрлі тоқаштар мен тәттілер, сондай-ақ ыстық шаймен қарсы алып жатыр.

- Мен үшін дауыс беруге жеке қатысу маңызды болды. Мен елде болып жатқан өзгерістерге қызығушылық танытамын және өзімнің азаматтық ұстанымымды білдіргім келді, - деп атап өтті Kazinform агенттігіне Брунель университетінің магистранты және London Kazakh Centre директоры Қуат Серіков.

Оның айтуынша, сайлауда дауыс беру – әрбір азамат үшін елдің дамуына үлес қосу мүмкіндігі. Сондай-ақ ол жастардың маңызды рөлін атап өтіп, болашақ көбінесе олардың белсенділігі мен жауапкершілігіне байланысты екенін атап өтті.

Референдумның сайлау учаскесі Лондон орталығындағы Пэлл-Мэлл, 125 мекенжайында орналасқан. Дауыс берушілер бюллетень алу үшін Қазақстан азаматының жеке басын куәландыратын құжатын көрсетуі керек.

Дауыс беру жергілікті уақыт бойынша кешкі сағат 20:00-ге дейін жалғасады, бұл Астана уақыты бойынша сағат 1:00-ге сәйкес келеді. Дауыс беру аяқталып, бюллетеньдер саналғаннан кейін қорытынды референдумның Орталық комиссиясына әуе поштасымен жіберіледі.

Еске сала кетсек, Қазақстандағы референдумның барлық сайлау учаскесі Астана уақыты бойынша таңғы сағат 7:00-де ашылды.