МАГАТЭ Иранда ешқандай ядролық қару тапқан жоқ агенттік басшысы

АСТАНА, 4 наурыз – Sputnik. Иранның ядролық бомба жасап жатқанына ешқандай дәлел жоқ, деп жазды МАГАТЭ басшысы Рафаэль Гросси әлеуметтік желідегі парақшасында.

Ол сондай-ақ Иранда МАГАТЭ-мен ынтымақтастық болмаса, агенттік ондағы ядролық бағдарламаның бейбітшілік сипатын растай алмайтынын қайта ескертті.

"Елдегі байытылған уран қорлары және агенттік инспекторларына толық қолжетімділік беруден бас тартуы үлкен алаңдаушылық тудырады. Осы себептерге байланысты мен алдыңғы есептерімде Иран агенттікке қалған мәселелерді шешуге көмектеспейінше, біз оның ядролық бағдарламасының тек бейбітшілікке бағытталғанын растай алмаймыз деп мәлімдегенмін", - деді Гросси.

Бұған дейін Иранның Австриядағы елшісі Асадолла Эшрак Джахроми Иранның МАГАТЭ-мен ынтымақтастықты жалғастыруға ниетті екенін мәлімдеген болатын.

"Қазіргі жағдай өте күрделі болып тұр, бірақ соңғы бірнеше жылда Иран Ислам Республикасы МАГАТЭ-мен ынтымақтастықты қамтамасыз етуге және сақтауға тырысты және біз мұны жалғастыруды жоспарлап отырмыз", - деді дипломат РИА Новостиге.

28 ақпанда АҚШ пен Израиль Иран Ислам Республикасына қарсы кең ауқымды әскери операция бастады. Тель-Авив соққылардың мақсаты Тегеранның ядролық қаруға ие болуына жол бермеу екенін мәлімдеді. Президент Дональд Трамп өз кезегінде Иранның әскери-теңіз күштері мен қорғаныс өнеркәсібін жою ниетін жариялап, ел азаматтарын режимді құлатуға шақырды.

1 наурызға қараған түні Иран телевизиясы Жоғарғы көсем Әли Хаменеидің қайтыс болғанын хабарлады. Тегеран Израиль аумағы мен Таяу Шығыстағы америкалық нысандарға соққы беру арқылы жауап берді.