Қазақстан МАГАТЭ алаңында ядролық қауіпсіздік бойынша Ұлттық баяндамасын ұсынды

2026 жылғы 13–24 сәуір аралығында Халықаралық атом энергиясы агенттігі (МАГАТЭ) алаңында Вена қаласында Ядролық қауіпсіздік туралы конвенция шеңберінде міндеттемелердің орындалуын қарау жөніндегі Уағдаласушы тараптардың 10-шы кеңесі өтіп жатыр.

Аталған кеңесте Қазақстан делегациясын ҚР Атом энергиясы агенттігінің Атомдық қадағалау және бақылау комитетінің төрағасы Дархан Алиақпаров таныстырады.

2026 жылғы 13 сәуірде қазақстандық тарап Ядролық қауіпсіздік туралы конвенция аясындағы міндеттемелерді орындау шеңберінде дайындалған 5-ші Ұлттық баяндаманы ұсынды.

Баяндамада ұлттық ядролық инфрақұрылымның қазіргі жағдайы мен даму перспективалары, сондай-ақ ядролық және радиациялық қауіпсіздіктің жоғары деңгейін қамтамасыз ету бойынша қабылданып жатқан шаралар туралы өзекті ақпарат ұсынылды. Онда атом энергетикасын дамыту мәселесіне ерекше назар аударылды.

Қазақстанда екі атом электр станциясын салу жоспарланған. Бүгінгі таңда Қазақстандағы алғашқы АЭС құрылысы бойынша халықаралық консорциумның көшбасшысы ретінде ресейлік Росатом мемлекеттік корпорациясы айқындалды.

Мемлекеттік реттеу жүйесін жетілдіру бойынша атқарылған жұмыстардың нәтижелері де ерекше атап өтілді. Атап айтқанда, ҚР Атом энергиясы агенттігі мен атом энергиясын пайдалану саласындағы тәуелсіз бақылауды қамтамасыз ететін Атомдық қадағалау және бақылау комитетінің құрылғаны көрсетілді.

— Қазақстан МАГАТЭ талаптарын қоса алғанда, халықаралық стандарттар мен озық тәжірибелерді енгізуге бағытталған. Кеңеске қатысу аясында қазақстандық тарап ашықтық, халықаралық ынтымақтастық және ядролық қауіпсіздік деңгейін тұрақты арттыру қағидаттарына бейілділігін растады. Ұлттық баяндаманы ұсыну Қазақстаннның ядролық инфрақұрылымды дамыту және халықаралық міндеттемелерге сәйкес реттеу жүйесін нығайту бағытындағы елеулі ілгерілеуін көрсетті, — деп түйіндеді агенттіктің баспасөз қызметі.

Бұдан бұрын Ерлан Қошанов Қазақстан атом энергетикасы дәуіріне қадам басып отырғанын айтты.