Маңғыстау облысына қоқыс өңдейтін кәсіпорын қажет

Маңғыстау облысына қоқысты жағу арқылы электр қуатын өндіретін кәсіпорын қажет.

Мәжіліс депутаты Еділ Жаңбыршиннің өңірге жұмыс сапары кезінде осындай бастама көтерілді. Баянды ауылының маңында аумағы 25 гектар болатын қоқыс полигоны бар. Оның жартысы қазір толып тұр. Полигонға қоқыс Ақтау мен Мұнайлы ауданынан ғана емес, Түпқараған ауданының кейбір ауылдарынан да жеткізіледі. Полигон 2016 жылы ашылғанда 30 жылға деп есептелген еді. Алайда, халық   санының өсуі мен қоқыс көлемінің артуына байланысты, қызмет ету мерзімі 20 жылға дейін қысқаруы мүмкін. Депутат Жанбыршин қалдықты қайта өңдеу жобасын қарастыруды ұсынды. Қоқыстан энергия өндіретін заманауи технологиялар қажет дейді. Айтуынша, бұл экологиялық тұрғыдан қауіпсіз әрі қазіргі стандарттарға сай. Бүгінде оңтайлы технологиялар қарастырылып, қоқыс көлемі мен логистика мәселесі зерттеліп жатыр, - деді ол.

Еділ Жанбыршин, ҚР Парламенті Мәжілісінің депутаты:

- Біздегі ақпарат бойынша, Қазақстанда жылына 5 млн тоннадай тұрмыстық қатты қалдықтар жиналады екен. Оның бар болғаны 15 пайызы ғана сұрыпталады. Сондықтан бүгін келіп, қарап жүргеніміз Маңғыстауға да осы технологияларды әкеліп, өңдеуіміз керек. Мұнан энергия алуға болады. Қазір технологиялар бар.     

Нәдірхан Қылышмағанбетов , «Маңғыстау жылу» МКК директоры:

- Тәулігіне 13 400 текше метрге дейін қоқыс келеді. Жылына тоннамен алғанда 120 мың тонна немесе 430-450 мың текше метрге дейін. Бұл жердегі өзекті мәселе - сұрыптау линиялары жоқ. Бірінші қабылданып, қоқыс сұрыпталып, соған қалған жарамсыз бөлігін ғана көмуге әкетуіміз керек. Ол жерде сұрыптау болғаннан кейін қабылдану көлемі көп болып тұр.