Маңғыстауда ҰҚК экс орынбасары мен Ақтау әуежайы аудиторы 500 мың доллар бопсалағаны үшін сотталды

Сот кабинетінде Маңғыстау облысының қылмыстық істер жөніндегі мамандандырылған ауданаралық сотының Ұлттық қауіпсіздік комитетінің облыстық департаменті басшысының бұрынғы орынбасары мен «Ақтау халықаралық әуежайы» АҚ авиациялық қауіпсіздікті бақылау және сапа аудиторына қатысты үкімі шықты.

Сот дерегінше, ҰҚК экс-орынбасары 2023 жылдың тамызында өңірдегі белгілі кәсіпкерден 500 мың долларын бопсалап алуды жоспарлаған. Ол бұл іске әуежай аудиторын тартып, оған негізгі бопсалаушы рөлін жүктеген.

Тергеу материалдарына сәйкес, ҰҚК экс-орынбасары өзінің қызметтік мүмкіндіктерін пайдаланып, кәсіпкер мен оның туыстары туралы беделіне нұқсан келтіруі мүмкін жеке сипаттағы мәліметтер жинаған. Кейін кәсіпкерге компромат салынған конверт жіберіліп, артынша әуежай аудиторы телефон арқылы хабарласып, мәселені «шетел валютасымен» үш күн ішінде шешуді талап еткен. Фотосуреттің сыртында «500 000» деп жазылған.

Кәсіпкер талапқа келіскендей болып, белгіленген кездесуде 500 мың доллардың орнына 500 мың теңге берген. Осыдан кейін күдіктілер ұсталған.

Сотта ҰҚК экс-орынбасары да, әуежай аудиторы да кінәларын мойындамады. Соған қарамастан, сот оларды бопсалау бойынша кінәлі деп таныды. ҰҚК экс-орынбасарына қызметтік өкілеттігін асыра пайдаланды деген айып та тағылды.

Сот үкімімен Ұлттық қауіпсіздік комитетіне қарасты департамент басшысының бұрынғы орынбасарына баптардың жиынтығы бойынша 11 жыл, Ақтау әуежайының қауіпсіздік аудиторына 8 жыл бас бостандығынан айыру жазасы тағайындалды. Сонымен қатар олардан жәбірленушінің пайдасына моральдық зиян ретінде 1 млн теңге және шамамен 3 миллион теңге сот шығындары өндірілмек. Үкім заңды күшіне әлі енген жоқ.

Бұған дейін, Таразда спорт кешенінің басшысын бопсалаған үш адам сотталған болатын.