Медеуде мұз, трибуналар мен киім ауыстыратын бөлмелер жаңартылады жобаның егжей тегжейі

Алматыда "Медеу" биік таулы спорт кешенін ауқымды жаңғырту жұмыстары жалғасып жатыр. Инженерлік инфрақұрылымның жаңартылғанына қарамастан, аңызға айналған мұз айдынының сыртқы келбеті өзгеріссіз сақталмақ. Бұл туралы Алматы құрылыс басқармасының басшысы Нұрбол Нұрсағатов мәлімдеді, деп хабарлайды Tengrinews.kz тілшісі.

Оның айтуынша, "Медеу" биік таулы мұз айдынын жаңғырту кезінде оның тарихи бейнесін сақтауға ерекше көңіл бөлінеді. Ол жұмыстар кешеннің сәулеттік және тарихи құндылығын ескере отырып жүргізіліп жатқанын атап өтті. Айта кетейік, кешен Қазақстан тарапынан ЮНЕСКО-ның Бүкіләлемдік мұра тізіміне енгізу үшін ұсынылған нысандардың алдын ала тізіміне кіреді. Сонымен қатар, басқарма басшысының сөзіне қарағанда, негізгі өзгерістер нысанның сыртқы келбетіне емес, кешеннің техникалық бөлігіне қатысты болмақ.

Жаңғырту аясында ауданы 10,5 мың шаршы метр болатын мұз айдынының технологиялық плитасы мен салқындату жүйесі толығымен жаңартылады. Жаңа жабдықтар ауа температурасы +15 градусқа дейін көтерілген жағдайда да мұздың тұрақты сапасын сақтауға мүмкіндік береді.

Сондай-ақ нысандағы инженерлік жүйелер де жаңартылады. Технологиялық процестерді автоматтандыру және жылумен жабдықтауды табиғи газға көшіру энергия ресурстарын тұтынуды 25–30 пайызға қысқартады деп күтіледі.

Өзгерістер спорттық инфрақұрылымды да қамтиды. Шығыс трибунасының астында төрешілерге арналған бөлмелер, допинг-бақылау аймағы және әрқайсының ауданы 50 шаршы метр болатын сегіз киім ауыстыратын орын жабдықталады. Олар халықаралық жарыстарды өткізу талаптарына сай болады.

Құрылыс басқармасы жаңғырту жұмыстары аяқталғаннан кейін "Медеу" қонақүйін жаңарту жоспарланып отырғанын хабарлады. Реконструкциядан кейін ол бір уақытта 140-қа жуық спортшыны қабылдай алады, бұл кешен базасында оқу-жаттығу жиындары мен халықаралық деңгейдегі жарыстарды өткізуге мүмкіндік береді. Сондай-ақ ведомство жобаның басты міндеті - кешеннің танымал тарихи бейнесін сақтай отырып, оның техникалық мүмкіндіктерін арттыру екенін баса айтты.

Бұл - "Медеу" кешені 1972 жылы ашылғаннан бергі үшінші ауқымды жаңарту жұмысы.

Іске қосылғаннан кейінгі алғашқы күрделі жөндеу 2001–2003 жылдары жүргізілді. Ол кезде мұз айдыны мен инженерлік инфрақұрылым жаңартылды. Жұмыс құны бес миллион доллар болды.

Бұдан кейін екінші реконструкция 2011 жылғы қысқы Азияда қарсаңында, 2008–2009 жылдары жасалған болатын. Ол кезде кешенді жаңартуға шамамен 19,4 миллиард теңге бағытталды.

Жаңа реконструкция жұмыстары 2025 жылдың наурызында жарияланды. Сол жылдың күзінде кешен айналасына құрылыс қоршаулары қойылып, дайындық жұмыстары мен жекелеген элементтерді демонтаждау басталды.

2025 жылдың желтоқсанында Алматы мәслихатының сессиясында қаланың 2026 жылға арналған бюджеті талқыланды. Ол кезде Экономика және қаржы басқармасының басшысы биік таулы мұз айдынын реконструкциялауды бастауға 15 миллиард теңге бөлу жоспарланғанын айтқан болатын.

Жұмыстар EPC-келісімшарты форматында жүзеге асырылып жатыр. Бұл мердігердің жобалау мен жабдықтарды сатып алудан бастап, құрылыс пен нысанды пайдалануға бергенге дейінгі толық жоба цикліне жауапты екенін білдіреді.

Жаңғырту жұмыстарын толығымен 2027 жылдың төртінші тоқсанында аяқтау жоспарланған. Редакция реконструкция барысын бақылап отыр.

Google News арқылы жаңалықтарымызды қадағалаңыз