Медеуде жасанды интеллект негізінде мұз жамылғысын бақылайтын жүйе енгізіледі

АСТАНА, 23 қазан – Sputnik. Алматыда "Медеу" биік таулы спорт кешенін ауқымды қайта жаңғырту жұмыстары басталды, деп хабарлады қала әкімдігі.

Жоба нысанның сәулеттік келбетін сақтай отырып, заманауи, энергия үнемдейтін және көпфункционалды кеңістік қалыптастыруды көздейді.

Бірінші кезеңде жаңа тоңазыту жүйесі орнатылып, инженерлік желілер жаңартылады және мұз жамылғысын бақылауға арналған AI-мониторинг жүйесі енгізіледі.

"Бұл энергия тұтынуды 25%-ға дейін азайтуға мүмкіндік береді. Сонымен қатар орындықтарға жылыту жүйесі орнатылады, қонақ үй "4 жұлдыз" стандартына сәйкес жаңғыртылады және спортшыларға арналған оңалту орталығы құрылады", - деп жазылған хабарламада.

Келесі кезеңде жылыту жүйесі бар ашық бассейн, экологиялық серуен бағыты бар эко-парк, панорамалық көпірлер, терасса және кофейнялар аймағы, сондай-ақ интерактивті музей салу жоспарланып отыр.

Қайта жаңғырту жұмыстарын 2027 жылы IV тоқсанда аяқтау көзделген.